काठमाडौँ: नेपाल तरुण दल काठमाडौंको अध्यक्षमा कृपेश श्रेष्ठ मनोनीत भएका छन्। संगठनको संस्थागत सुदृढीकरण, सांगठनिक एकता र राजनीतिक गतिविधिलाई थप प्रभावकारी बनाउने उद्देश्यसहित श्रेष्ठलाई जिल्ला अध्यक्षको जिम्मेवारी दिइएको हो।
नेपाल तरुण दलका केन्द्रीय अध्यक्ष दिल लामाले जारी गरेको मनोनयनपत्रअनुसार श्रेष्ठलाई संगठनको विधानबमोजिम काठमाडौं जिल्ला अध्यक्षमा मनोनीत गरिएको हो। नवनियुक्त अध्यक्ष श्रेष्ठलाई आगामी ६ महिनाभित्र जिल्ला अधिवेशन सफलतापूर्वक सम्पन्न गराउने जिम्मेवारीसमेत दिइएको छ।
मनोनयनपत्रमा राष्ट्रियता, लोकतन्त्र, समाजवाद र तरुण एकताको आदर्शलाई आत्मसात् गर्दै संगठनलाई थप सुदृढ, एकताबद्ध, गतिशील र व्यवस्थित बनाउने विश्वास व्यक्त गरिएको छ। काठमाडौंजस्तो राजनीतिक रूपमा महत्त्वपूर्ण जिल्लाको नेतृत्व सम्हालेका श्रेष्ठका सामु संगठनलाई सक्रिय बनाउनेदेखि जिल्ला अधिवेशनमार्फत सांगठनिक संरचनालाई व्यवस्थित गर्ने जिम्मेवारी आएको छ।
केन्द्रीय अध्यक्ष लामाले श्रेष्ठको सफल कार्यकालको कामना गर्दै संगठनको नेतृत्व प्रभावकारी रूपमा अघि बढाउने विश्वास व्यक्त गरेका छन्।
श्रेष्ठको मनोनयनसँगै नेपाल तरुण दल काठमाडौंको आगामी सांगठनिक गतिविधि र जिल्ला अधिवेशनको तयारीले गति लिने अपेक्षा गरिएको छ।

