काठमाडौँ: प्रभु बैंकले कर्जा प्रवाह र रेमिट्यान्स कारोबारसँग सम्बन्धित विषयमा अनुशासनात्मक कारबाही गर्दै चार कर्मचारीमाथि कारबाही गरेको छ। बैंकले चिफ बिजनेस अफिसर रश्मी पन्तसहित दुई कर्मचारीलाई सेवाबाट हटाएको छ भने अन्य दुई कर्मचारीको बढुवा रोक्का र पद घटुवा गरेको छ।
बैंकको आन्तरिक सर्कुलरअनुसार सुगेन शाक्य र रश्मी पन्तलाई २०८३ कात्तिक २० गतेदेखि लागू हुने गरी सेवाबाट बर्खास्त गरिएको हो। मधुसूदन न्यौपानेको दुई वर्षका लागि बढुवा रोक्का गरिएको छ भने सुदीप श्रेष्ठलाई सहायक पदबाट कनिष्ठ सहायकमा घटुवा गरिएको छ।
बैंकले कर्मचारी सेवा विनियमावली, २०७८ को परिच्छेद ८३ अनुसार कारबाही गरेको जनाएको छ।
बैंकले सुगेन शाक्यमाथि प्रभु ग्रुप इंकसँग सम्बन्धित रेमिट्यान्स कारोबारमा आवश्यक बैंकिङ सतर्कता नअपनाएको आरोप लगाएको छ। त्यस्तै, रश्मी पन्तमाथि एसियन भिलेज रिसोर्ट प्रालिलाई कर्जा प्रवाह गर्दा आवश्यक कानुनी तथा धितोसम्बन्धी प्रक्रिया पूरा नगरेको आरोपमा कारबाही गरिएको हो।
यी दुवै विषय अदालतमा विचाराधीन छन्। बैंकले आन्तरिक अनुशासन तथा कर्मचारी सेवा विनियमावलीअनुसार कारबाही गरेको भए पनि अदालतबाट अन्तिम फैसला भइसकेको अवस्था भने छैन।
बैंकले स्थापित कार्यविधि पालना नगरेको आरोपमा मधुसूदन न्यौपानेको दुई वर्षका लागि बढुवा रोक्का गरेको छ।
त्यस्तै, सामूहिक सौदाबाजी सम्झौता ९सीबीए० को नतिजाप्रति असन्तुष्टि जनाउँदै ठूलो संख्यामा कर्मचारीलाई अनधिकृत इमेल पठाएको विषयमा सुदीप श्रेष्ठलाई सहायकबाट कनिष्ठ सहायक पदमा घटुवा गरिएको बैंकले जनाएको छ।

