काठमाडौँ: प्रधानमन्त्री वालेन्द्र शाह आगामी मंसिर ६ गते छिमेकी राष्ट्र भारतको औपचारिक भ्रमणमा जाँदैछन्। भारतीय प्रधानमन्त्री नरेन्द्र मोदीको निमन्त्रणामा प्रधानमन्त्री शाह दुईदिने भारत भ्रमणका क्रममा भारत जान लागेका हुन्।
भ्रमण टोलीमा ३४ सदस्यीय नेपाली प्रतिनिधिमण्डल रहनेछ। शुक्रबार परराष्ट्र मन्त्रालयले पत्रकार सम्मेलन गरी प्रधानमन्त्री शाह मंसिर ६ गते दिउँसो १ः४५ बजे नेपाल वायुसेवा निगम (नेपाल एयरलाइन्स) को विमानमार्फत नयाँ दिल्ली प्रस्थान गर्ने जानकारी दिएको हो।
परराष्ट्र मन्त्रालयकाअनुसार भ्रमण टोलीमा अर्थमन्त्री स्वर्णिम वाग्ले, परराष्ट्रमन्त्री शिशिर खनाल, प्रधानमन्त्रीका प्रमुख सल्लाहकार कुमार बेनसहित ३४ जना सहभागी हुनेछन्। त्यसैगरी निजी क्षेत्रका ५२ जना प्रतिनिधि पनि आफ्नै खर्चमा भ्रमणमा सहभागी हुनेछन्।
भ्रमणका क्रममा प्रधानमन्त्री शाहले भारतीय राष्ट्रपति द्रौपदी मुर्मुसँग शिष्टाचार भेट गर्ने कार्यक्रम रहेको छ। त्यस्तै, भारतीय प्रधानमन्त्री नरेन्द्र मोदीसँग प्रतिनिधिमण्डलस्तरीय वार्ता हुनेछ।
प्रधानमन्त्री मोदीले नेपाली प्रधानमन्त्री शाहको सम्मानमा औपचारिक दिवाभोजसमेत आयोजना गर्ने कार्यक्रम रहेको छ। यसका अतिरिक्त प्रधानमन्त्री शाहले भारतीय विदेशमन्त्री एस. जयशंकरसँग पनि शिष्टाचार भेट गर्नेछन्।
दुई देशबीचको उच्चस्तरीय भेटघाट तथा वार्तापछि प्रधानमन्त्री शाह नेतृत्वको नेपाली प्रतिनिधिमण्डल मंसिर ७ गते स्वदेश फर्किने कार्यक्रम रहेको छ।

