जेनजी आन्दोलनमा जलेको नख्खु दोबाटोको प्रहरी बिट पुनर्निर्माण गरी हस्तान्तरण

काठमाडौँ: ललितपुर महानगरपालिका–४ स्थित नख्खु दोबाटोमा रहेको प्रहरी बिट पुनर्निर्माण भएको छ। बुधबार आसेज वाउले ललितपुर महानगरपालिका–४ वडा कार्यालयसँगको सहकार्यमा प्रहरी बिट पुनर्निर्माण गरी हस्तान्तरण गरेको हो।

उक्त प्रहरी बिट अघिल्लो वर्ष भदौ २४ गते जेनजी आन्दोलनका क्रममा आगजानी र तोडफोडबाट क्षतिग्रस्त भएको थियो।

कार्यक्रममा वडा नम्बर ४ का अध्यक्ष सन्तोष खड्काले प्रहरी बिटको उद्घाटन गरे। कार्यक्रममा प्रहरी प्रभाग सानेपाका प्रमुख माधव विश्वकर्मासहित स्थानीय जनप्रतिनिधि, नेपाल प्रहरीका प्रतिनिधि तथा स्वयंसेवकहरूको उपस्थिति रहेको थियो।

कार्यक्रमलाई सम्बोधन गर्दै वडा अध्यक्ष खड्काले आसेज वाउले लामो समयदेखि ललितपुर क्षेत्रमा सरसफाइ, पुनर्निर्माण, रक्तदानलगायत विभिन्न सामाजिक सेवामूलक गतिविधि सञ्चालन गर्दै आएको उल्लेख गर्दै त्यसप्रति धन्यवाद व्यक्त गरे। उनले आगामी दिनमा पनि सामाजिक विकासका कार्यक्रमहरूमा सहकार्यलाई निरन्तरता दिने प्रतिबद्धता जनाए।

आसेज वाउओ अन्तर्राष्ट्रिय स्वयंसेवक सञ्जाल हो, जसले विभिन्न देशका युवा पेशाकर्मीहरूको सहभागितामा वातावरण संरक्षण, विपद् सहयोग, रक्तदान, शैक्षिक सहयोग, सरसफाइ तथा अन्य सामाजिक सेवामूलक कार्यक्रम सञ्चालन गर्दै आएको जनाएको छ। संस्थाले मानवता, वातावरण संरक्षण र दिगो विकासका क्षेत्रमा समुदायसँग सहकार्य गर्दै स्वयंसेवी अभियान सञ्चालन गरिरहेको जनाएको छ।