अविरल वर्षाले देशभर विद्युत् पूर्वाधारहरूमा कहाँ कहाँ के के भयो क्षति? [विस्तृत विवरण]

काठमाडौँ: अविरल वर्षाले देशभर विद्युत् पूर्वाधारहरूमा क्षति पुगेको छ।ऊर्जा, जलस्रोत तथा सिँचाइ मन्त्रालयलाई हालसम्म उपलब्ध विवरणअनुसार पोखरा, बुटवल, हेटौंडा र काठमाडौं क्षेत्रमा बाढी, लाइन फाल्ट तथा उपकरण/लाइनको ओभरलोडका कारण ठूलो परिमाणमा विद्युत् आपूर्ति प्रभावित भएको देखिन्छ।

‍वर्षा, बाढी र पहिरोले पोखरा क्षेत्रमा सबैभन्दा बढी प्रभाव परेको छ। कुस्मा–न्यू बुटवल २२० केभी लाइनमा फाल्टका कारण करिब २०० मेगावाट प्रभावित भएको छ।रौघाङ–दाना लाइन १ र २ मा करिब १५५ मेगावाट प्रभावित भएको मन्त्रालयले जनाएको छ।

कालीगण्डकी, अपर मादी, सुपर मादी, सिक्लेस–नामर्जुङ, सेती नदी–करुवासेट, अपर दोर्दी, मोदी लगायतका आयोजनाहरूमा बाढीका कारण उत्पादन/आपूर्ति अवरुद्ध भएको छ भने पोखरा क्षेत्रका विभिन्न आयोजनाबाट मात्र करिब ४०० मेगावाट भन्दा बढी क्षमता प्रभावित भएको देखिन्छ।

न्यू बुटवल–कुस्मा २२० केभी लाइनको फाल्टपछि करिब ११० मेगावाट प्रभावित भएको छ।बुटवल क्षेत्रमा न्यू भारतपुर–न्यू बुटवल २२० केभी लाइनमा रुख ढलेर फाल्ट भएको थियो। लाइन बिहान ९:५१ बजे चार्ज गरिएको मन्त्रालयले जानकारी दिएको छ।

चापर–पथलैया १३२ केभी लाइन आउट हुँदा कावासोती एसएस मा १ घण्टा लोड कटौती गरिएको छ। हेटौंडा क्षेत्रमा माण्डु ६६ केभीमा बाढीका कारण करिब ३२ मेगावाट प्रभावित भएको छ। कावासोती–भारतपुर १३२ केभीमा भारतपुर एसएसमा सीभीटी बर्न्ट भएको उल्लेख छ।

सिमरा एसएसमा करिब २० मेगावाट, अमलेखगञ्ज/परवानीपुर/वीरगञ्ज उद्योगमा करिब ८० मेगावाट, तथा काम्ने एसएस/उद्योगमा करिब २५ मेगावाट आपूर्ति प्रभावित छ।

काठमाडौं क्षेत्रमा पाटन एसएसमा करिब १० मिनेट अवरोध भएको थियो।

टेकुमा पनि १९ मिनेट अवरोध भएको थियो। पाटनमा पथलैया लाइन र केएल–वन स्युचाटार ६६ केभी एकै समयमा ओभरलोड भएको तथा बाढीका कारण एमआरएस इमर्जेन्सी सप्लाई प्रयोग गरिएको उल्लेख छ।