नयाँबानेश्वरस्थित मौलिक भान्छाघरमा दशैं विशेष मेला सुरु

काठमाण्डौँ: ‘स्थानीय उत्पादनको प्रवर्द्धन, किसानको सम्मान र मौलिकता संरक्षण’ का लागि नयाँबानेश्वरस्थित मौलिक भान्छाघरमा दशैं विशेष मेला सुरु भएको छ।

अन्तर्राष्ट्रिय ग्रामीण महिला दिवस र बडा दशैं २०८३ को अवसरमा आयोजित मेला भोलिसम्म सञ्चालन हुनेछ। मौलिक भान्छाघरको आयोजनामा नेपाल कृषि सहकारी केन्द्रीय संघ लि. र राष्ट्रिय कृषक समूह महासंघ, नेपालको सहकार्यमा भएको दुई दिने दशैं विशेष मौलिक मेला शुक्रबार र शनिबार सञ्चालन गरिने छ।

शुक्रबारको दशैं विशेष मौलिक मेलामा च्याङ्ग्रा, खसी, लोकल कुखुरा, मौसमी तरकारी तथा फलफूलहरू, मसला, कोदो, फापर, जौ, गहुँ तथा चामल तथा खाद्यान्न, ढाका तथा अल्लोको कपडाहरूलगायतका स्थानीय र मौलिक सामानको प्रदर्शनी गरिएको थियो। शनिबार पनि बिहान ७ बजेदेखि दिउँसो १२ बजेसम्म मेला सञ्चालन हुने आयोजकले जनाएको छ। शुक्रबारको मेलामा खसी, च्याङ्ग्राको मासु, ताजा फलफूल तथा तरकारी, मसलाजन्य सामानमा उपभोक्ताको विशेष आकर्षण रहेको थियो।

शनिबारको मेलामा च्याङ्ग्रा, लोकल खसी, भेडा, लोकल कुखुरा सिङ्गै तथा मासु, सेलरोटी, मासु चिउरा, पक्कु, खिर–बाबर तथा सातै प्रदेशका रैथाने स्वाद (घर प्रयोजनका लागि प्याकेजिङसहित) किसानको कोसेली र किसानको पोकाका प्याकेजहरू, जुम्ली सिमी, भिर मौरीको मह, सिजनल तरकारी र फलफूल, तोरीको तेल, सखर, लप्सी, जुम्लाको स्याउ, ढाका तथा अल्लोको कपडालगायत सामान खरिद गर्न सकिने छ।