नायिका पूजा शर्माको रावायण किन सुस्तायो?

काठमाडौं– पटक–पटक विवादमा परिरहने नायिका पूजा शर्माको चलचित्र ‘रावायण’ बक्स अफिसमा फितलो सावित भएको छ। प्रर्दशनको प्रारम्भमा हलहरुतिर गतिलै चहलपहल दिएको भनिएको चलचित्रको आइतबारको व्यवसाय भने अत्यन्तै कमजोर देखिएको हो।

दुई दिनअघि शुक्रबारदेखि हलहरुमा सार्वजनिक भएको सुर्दशन थापा निर्देशित फिल्म ‘रावायण’को व्यवसायिक ध्वस्तिकरणमा विवादित नायिका शर्मा नै कारण रहेको टिप्पणी फिल्म जगतमा सुनिन थालेको छ। नायिका शर्माले हालै मात्र आफ्नो फिल्मको पब्लिसिटीका सिलसिलामा गायिका समिक्षा अधिकारीलाई जोडेर आफ्नो अभिव्यक्ति दिएपछि उनको आलोचना सुरु भएको थियो। कतिपयले त सामाजिक सञ्जालमा ‘पूजाको फिल्म बहिष्कार गर्नुपर्ने’ मत समेत राखेका छन्। नायिका शर्माले नायक पल शाह जो उनको फिल्म रावायणका अभिनेता समेत हुन्, लाई ‘ग्लोरीफाइ’ गर्नका लागि गायिका समिक्षा अधिकारीप्रति कटाक्ष गरेपछि उनीबारे यस्ता प्रतिक्रियाहरु सतहमा आएका थिए।

‘रावायण’मा पल शाह, पूजा शर्मा, प्रियंका कार्की, प्रमोद अग्रहरि, निकिता चण्डक, प्रकाश शाह, कैलाश रावल, अर्जुनजंग शाहीलगायत कलाकारको अभिनय छ। स्टारडम् र तिब्रतम् प्रचारप्रसार शैली अख्तियार गरेको सो फिल्मका कलाकारहरु शुक्रबार र शनिबार उपत्यकाका विभिन्न हलमा पुगेर दर्शकलाई हौसला दिने अभ्यासमा थिए। ‘तर आइतबार एकाएक फिल्मको व्यापार त्यति अपेक्षाकृत देखिएन’ फिल्म रावायणसम्बद्ध एक सदस्यले भने, ‘फिल्मको डिजिटल राइट र विदेशबाट भएको व्यापारिक प्रविद्धताले एक हदसम्म फिल्मले लगानी उठाउला कि भन्ने थियो तर घरेलु व्यापार उकासिएन भने फिल्म फ्लप दर्जामा पुग्ने सम्भावना देखियो।’

‘रावायण’मा सुदर्शन थापाको कथा र शिवम अधिकारीको लेखन छ। साउथ इन्डियन फिल्मी फर्मूलाबाट प्रभावित यो फिल्म निर्माणमा निर्देशक थापाले अधिक मिहिनेत गरेको निर्माण टिमको विश्वास पनि थियो। ‘डाइरेक्टर सापको मिहिनेत राम्रै थियो। फिल्म फ्लप भयो भने त्यसको कारण अरु कोही नभएर पूजा शर्मा नै हुने निश्चित छ’, ‘रावायण’ टिमसँग जोडिएका ती सदस्यले भने, ‘पब्लिसीटीका लागि अरु कुराहरुमा हेक्का नराखी बोल्ने पूजाको बानीले उनैलाई हानी हुने देखियो।’