पहिलो पटक अवार्ड लिँदा अक्षय कुमारले महसुस गरेको बेइज्जती

काठमाडौँ– अक्षय कुमार बलिउडका चर्चित अभिनेता हुन्। तीन दशकभन्दा लामो करिअरमा उनले धेरै उत्कृष्ट फिल्ममा काम गरे।

उनी आफ्नो कामको लागि कैयौं पटक सम्मानित पनि भइसकेका छन्। तर,एकपटक उनले राष्ट्रिय पुरस्कार प्राप्त गर्दा ठूलो बेइज्जती महसुस गरेका थिए। यसबारे कमैलाई थाह होला।

हालै अक्षय कुमारको एक पुरानो अन्तरवार्ता भाइरल भइरहेको छ। जहाँ उनले ६५औं राष्ट्रिय पुरस्कार समारोहको एउटा घटना सम्झिएका छन्। यस अवसरमा उनलाई पहिलो पटक ‘रुस्तम’ फिल्मका लागि बेस्ट एक्टरको राष्ट्रिय पुरस्कार प्रदान गरिएको थियो।

अक्षयले अन्तरवार्तामा भनेका छन्, ‘मैले आफ्नो पहिलो नेशनल अवार्ड लिँदा निकै अजीब अनुभव गरेँ। त्यहाँ म बसेको थिएँ, तब एक मलयालम अभिनेत्री आएर मसँग भनिन्म– तपाईंको ठूलो फ्यान हुँ, तपाईंका सबै फिल्महरू हेरेकी छु। अवार्ड जित्नुभएकोमा बधाई छ।

म एकदमै खुशी भएँ। तर त्यसपछि उनले सोधिन्– पाईंले अहिलेसम्म कति फिल्म गर्नुभएको छ?

मैले गर्वसाथ भनेँ– १३५ फिल्म गरिसकेको छु।

अनि मैले उनलाई सोधें– तपाईंले कति फिल्म गर्नुभएको छ? उनले भनिन्– यो मेरो पहिलो फिल्म हो।

पहिलो फिल्ममै उनले राष्ट्रिय पुरस्कार जितिन्। तर मलाई त्यो अवार्ड पाउन वर्षौं लाग्यो। यो मेरो लागि अलि लाजमर्दो पल थियो।’

अक्षयले हालै मात्र ‘खेल खेलमा’ फिल्ममा एमी विर्क, तापसी पन्नू, वाणी कपूर, फरदीन खान र अन्य कलाकारहरूसँग अभिनय गरेका थिए।

अब उनी ‘स्काई फोर्स’, ‘सिंघम अगेन’ र ‘भूत बंगला’ जस्ता फिल्महरूमा देखिनेछन्। ‘स्काई फोर्स’ जनवरी २४, २०२५ मा रिलिज हुँदैछ, जुन पाकिस्तानमाथि भएको पहिलो एयर स्ट्राइकको साँचो घटनामा आधारित हुनेछ।