४७ हजारको ज्यान लिएको इजरायल हमास १५ महिने युद्ध रोकियो !

एजेन्सी – इजरायल र हमास गाजामा १५ महिना लामो युद्ध रोक्न सहमत भएका छन्।

युद्धविरामको क्रममा हमासले गाजामा बन्धक बनाएका इजरायली नागरिकहरूलाई रिहा गर्नेछ। बदलामा इजरायलले हमासका मानिसहरूलाई पनि रिहा गर्नेछ।

तर, युद्धविरामको औपचारिक घोषणा हुन भने बाँकी छ । इजरायलका प्रधानमन्त्री बेन्जामिन नेतन्याहुको कार्यालयले भन्यो– हमाससँग युद्धविरामको सम्झौता अहिलेसम्म भएको छैन। अन्तिम वार्ता जारी छ।

अर्कोतर्फ, अमेरिकी राष्ट्रपति जो बाइडेन र कतारका प्रधानमन्त्री शेख मोहम्मद बिन अब्दुल रहमान बिन जसिम अल थानीले युद्धविराम सम्झौताको पुष्टि गरेका छन्। थानीका अनुसार युद्धविराम जनवरी १९ देखि लागू हुनेछ।

अल जजिराको रिपोर्टका अनुसार थानीले बुधबार हमास र इजरायलका प्रतिनिधिहरूसँग भेट गरेपछि सम्झौता पूरा भएको बताएका हुन्।

अमेरिकाका नवनिर्वाचित राष्ट्रपति डोनाल्ड ट्रम्पले पनि गाजामा युद्धविराम सम्झौता भएको बताएका छन्। अब मध्यपूर्वमा बन्धकहरू छिट्टै रिहा हुनेछन्।

गाजामा इजरायल र हमासबीच २०२३ अक्टोबर ७ देखि युद्ध चलिरहेको थियो। यसमा दुवै पक्षका ४७ हजारभन्दा बढीको ज्यान गएको छ।