थाई प्रधानमन्त्रीलाई निलम्बन गर्ने अदालतको आदेश

काठमाडौँ- थाइल्यान्डको संवैधानिक अदालतले प्रधानमन्त्री पेटोङतार्न सिनावात्राको पद निलम्बन हुने आदेश गरेको छ। संवैधानिक अदालतको बहुमतबाट उनको पद निलम्बनमा जाने आदेश गरेको हो।

प्रधानमन्त्री सिनावात्रालाई आफ्नो बचाउ पेस गर्न १५ दिनको समय दिइएको छ। प्रधानमन्त्री सिनावात्राले कम्बोडियाली नेता हुन सेनसँग गरेको टेलिफोन कुराकानी चुहावट भएको थियो। त्यसपछि राजीनामा गर्न उनीमाथि दबाब थियो।

‘लिक’ क्लिपमा उनले हुन सेनलाई ‘अंकल’ भनेर सम्बोधन गरेकी थिइन्। अंकल सेनसँगको कुराकानीमा उनले सीमा क्षेत्रमा खटिएका एक जना थाई सैन्य कमान्डरको आलोचना गरेकी थिइन्।

आफ्नो देशको सेनाका कमान्डरको आलोचना गरेको क्लिप सार्वजनिक भएपछि थाइल्यान्डमा आक्रोश देखिएको थियो। उनलाई बर्खास्त गर्न माग गरिएको थियो।

दुई दशकयता थाइल्यान्डको राजनीतिमा सिनावात्रा परिवार शक्तिशाली मानिन्छ। यो परिवारबाट कार्यकाल पूरा गर्नुअघि सत्ता गुमाउने सूचीमा सिनावात्रा परिवारबाट हालकी प्रधानमन्त्री तेस्रो बनेकी छन्।

सिनावात्रालाई प्रधानमन्त्री बनाउने गठबन्धन पहिलेदेखि नै थोरै मतको अग्रताका साथ बहुमतमा थियो। दुई सातअघि एक प्रमुख रूढिवादी सहयोगी दलले गठबन्धन छोडेको थियो।

प्रधानमन्त्री सिनावात्रा निलम्बितपछि उपप्रधानमन्त्री सुरिया जुङरुङरुवाङ्कितले देशको कार्यवाहक बनेका छन्।