कालिङ्गामा अमोल पालेकर र सन्ध्यासँग बुद्धिसागरको संवाद

काठमाडौँ:  आगामी भदौ २८ र २९ गते ललितपुरको हिमालय होटलमा हुने चौथो संस्करणको ‘कालिङ्गा साहित्य महोत्सव’मा देशविदेशका साहित्यकार, गायक, संगीतकार, कलाकार र कूटनीतिज्ञलगायत सहभागी हुँदैछन्।

कार्यक्रमको दोस्रो दिन भदौ २९ गते उत्सवमा चर्चित भारतीय अभिनेता एवं निर्देशक अमोल पालेकर र लेखिका सन्ध्या गोखलेसँग नेपाली लेखक बुद्धिसागरले संवाद गर्ने भएका छन्। पालेकर र गोखले श्रीमानश्रीमती हुन्। सेसन दिउँसो १२:१० देखि १ बजेसम्म चल्नेछ। ‘लाइफ इन फ्रेम : अमोल पालेकर’ शीर्षकको यस विशेष सत्रमा पालेकर र गोखलको जीवनयात्रा, कला र सिर्जनाबारे संवाद हुनेछ।

७० र ८० को दशकमा हिट सिनेमा दिएका पालेकर सादगीपूर्ण अभिनय र निर्देशनका कारण चर्चित छन्। १९६७ मा थिएटरबाट अभिनय यात्रा थालनी गरेका पालेकरले मराठीसहित हिन्दी सिनेमामा समेत काम गरेका छन्। रजनीगंधा, गोलमाल, छोटी सी बात, भूमिका, सफेद, झूट, बातों बातों में, बात बनजाए, अक्रिट, नरम गरम, तेस्रा कानुनलगायत दर्जनौँ फिल्ममा काम गरेका छन्।

उनलाई गोलमाल, अक्रिट र भूमिका फिल्मबाट फिल्मफेयर अवार्ड प्राप्त भएको थियो।

पालेकरले अक्रिट, आँखें, दायरा, थोडा सा रुमानी हो जाए, आहट, क्विस्टलगायत फिल्म निर्देशन समेत गरेका छन्। यस्तै सन्ध्या गोखलेले पहेली, समान्तर, वि आर अन, १९४२: अ लभ स्टोरीलगायत फिल्म लेखेकी छन्। बुद्धिसागर कर्णाली ब्लुज, फिरफिरे, एक्लोजस्ता चर्चित उपन्यासका लेखक हुन् भने उनको ‘बुद्धिसागरका कविताहरु’ पुस्तक पनि प्रकाशित छ।

यस पटकको संस्करणको मूल विषय ‘सीमापारिः बदलिँदो विश्वमा दक्षिण एशियाली साहित्य’ रहेको छ। महोत्सवमा भारत, नेपाल, भूटान, बंगलादेश र श्रीलङ्कासहित करिब ३०० लेखक सहभागी हुने नेपालस्थित आयोजकले बताएको छ ।

कार्यक्रमले नेपाल–भारत तथा दक्षिण एशियाली मुलुकबीचको साहित्यिक र सांस्कृतिक सम्बन्ध सुदृढ बनाउने कालिङ्गाका संस्थापक तथा निर्देशक रश्मी रञ्जन परिदाले बताए। ‘यस महोत्सवमा साहित्य, संगीत, नृत्य, कवितालगायत कलाको प्रदर्शनी हुनेछ,’ उनले भने, ‘नेपाल, भारत र दक्षिण एसियाको सांस्कृतिक र बौद्धिक विषय आदान प्रदानका साथै लामो समयदेखि कायम आपसी सम्बन्ध पनि बलियो बनाउने विश्वास हामीले लिएका छौँ।’

चौथो संस्करणलाई यसअघिका कार्यक्रम भन्दा विशेष र प्रभावकारी बनाउनेगरी तयारी गरिएको उनको भनाइ छ।

यस पटकको महोत्सवमा ‘अन्तर्राष्ट्रिय बुकर पुरस्कार २०२५’का विजेता भारतीय लेखिका बानु मुस्ताक पनि सहभागी हुनेछिन् । उनीसँगै अनुवादक दीपा भास्टी, इतिहासकार डा विक्रम संपत, लेखक तथा कूटनीतिज्ञ विकास स्वरूपलगायत दक्षिण एशियाली र अन्तर्राष्ट्रिय ख्यातिप्राप्त लेखकहरू महोत्सवमा सहभागी हुनेछन्।

महोत्सवमा प्यानल छलफल, कविता वाचन, पुस्तक लोकार्पण, लेखकसँग अन्तरक्रिया, लेखन तथा अनुवाद कार्यशाला र सांस्कृतिक प्रस्तुति हुनेछन्। कार्यक्रमले नेपाल–भारत तथा दक्षिण एशियाली मुलुकबीचको साहित्यिक र सांस्कृतिक सम्बन्ध सुदृढ बनाउने आयोजकको विश्वास छ।