२०२५ : जब विश्व अशान्त छ, यी हुन् बस्नका लागि सबैभन्दा शान्त चार देश

एजेन्सी: सन् २०२५ मा जब विश्वका धेरै देशहरू युद्ध, सिमाना सुरक्षा र व्यापारिक तनावको अवस्थाबाट गुज्रिरहेका छन्, त्यही समयमा केही देशहरू अझै पनि शान्तिको झण्डा उचालेर स्थिर र सुरक्षित जीवनको उदाहरण बनेका छन्।

ग्लोबल पिस इन्डेक्स (जीपीआई) २०२५ अनुसार विश्वभर संघर्षहरूको संख्या दोस्रो विश्वयुद्धपछिकै उच्चतम स्तरमा पुगेको छ। यस वर्ष मात्रै तीन नयाँ संघर्ष सुरु भएका छन्। धेरै देशहरूले आफ्नो सैनिक शक्ति विस्तार गर्न थालेका छन्। यो रिपोर्ट ‘इन्स्टिच्युट फर इकोनोमिक्स एण्ड पिस’ले तयार गरेको हो, जसमा २३ विभिन्न सूचकका आधारमा देशहरूको बाह्य र आन्तरिक तनाव, रक्षा खर्च, आतंकवाद र सुरक्षाको अवस्था मूल्यांकन गरिएको छ।

तर, यस्ता अशान्त अवस्थाबीच पनि केही देशहरू छन्, जसले लगातार दुई दशकदेखि स्थायित्व र शान्तिपूर्ण नीति कायम राखेका छन्। उनीहरूको नीति र समाजिक मूल्यले त्यहाँका नागरिकहरूमा सुरक्षाको गहिरो अनुभूति दिलाएको छ।

आइसल्यान्ड
सन् २००८ देखि अहिलेसम्म आइसल्यान्ड विश्वको सबैभन्दा शान्तिपूर्ण देश बनेको छ। सुरक्षा, संघर्ष नियन्त्रण र सैन्य शक्ति सन्तुलनका हिसाबले यस देशले निरन्तर सुधार गरेको छ। यहाँका मानिसहरूका अनुसार सुरक्षा र भरोसाको भावना उनीहरूको दैनिकीको हिस्सा हो।

इन्गा रोस एन्तोनियुसदोत्तिर, इन्क्रेपिड ट्राभल नर्थ युरोप की महाप्रबन्धक भन्छिन्, ‘यहाँको ठन्डा मौसम कहिलेकाहीँ कठोर हुन्छ, तर मानिसबीचको अपनत्व नै वास्तविक सुरक्षा हो। तपाईं रातमा एक्लै हिँड्न सक्नुहुन्छ, डर लाग्दैन। बच्चाहरू कारमा सुतिरहेका हुन्छन्, अभिभावक नजिकै क्याफेमा खानेकुरा खाँदै वा काम गर्दै हुन्छन्।’

उनका अनुसार यहाँको लैङ्गिक समानता र सामाजिक व्यवस्था ले महिलालाई अझ सुरक्षित र आत्मविश्वासी बनाएको छ। ‘समान अवसर र बलियो सामाजिक संरचना नै सुरक्षित समाजको आधार हो,’ उनी भन्छिन्।

‘यदि तपाईं आइसल्यान्डको शान्ति महसुस गर्न चाहनुहुन्छ भने, यहाँका स्थानीयहरूझैं बाँच्ने प्रयास गर्नुहोस्। तातो पानीको पूलमा पौडी खेल्नुहोस्, अपरिचितहरूसँग हट टबमा कुरा गर्नुहोस् वा पहाड चढ्नुहोस्। आइसल्यान्डको वास्तविक सुन्दरताको अनुभव प्रकृति, कला र संगीतमा पाइन्छ,’ उनले भनिन्।

आयरल्यान्ड
बीसौँ शताब्दीका अन्त्यतिरका राजनीतिक संघर्षपछि पनि आज आयरल्यान्ड शान्ति र स्थिरताको प्रतीक बनेको छ। यो देश सैन्य तटस्थता अपनाउने कारणले विश्वका सबैभन्दा शान्त देशमध्ये रहँदै आएको छ।

किल्डेयरका ज्याक फिट्जसिमन्स भन्छन्, ‘यहाँका मानिसहरू साँच्चै एक-अर्काको ख्याल गर्छन्। कुनै अपरिचितले सहयोग मागेमा, सहयोग गर्न सबैले सक्दो प्रयास गर्छन्।’

यहाँको सामुदायिक भावना, सामाजिक सुरक्षा, र कम अपराध दर ले सबैलाई अपनत्व र सन्तुलनको अनुभूति गराउँछ। अन्तर्राष्ट्रिय तहमा, आयरल्यान्डले विवाद समाधानका लागि वार्ता र कूटनीति लाई प्राथमिकता दिन्छ।

सांस्कृतिक सम्पदा र प्राकृतिक सौन्दर्यको संरक्षण यहाँको राष्ट्रिय गौरव हो। ‘यहाँ जीवनको गति सुस्त छ, मानिसहरू अझै पनि कुराकानी र कथालाई महत्व दिन्छन्। हरेक कुनामा तपाईंलाई परम्परागत संगीत, पुराना किला र हरियो बनको शान्ति भेटिन्छ,’ फिट्जसिमन्स भन्छन्।

न्यूजिल्यान्ड
यस वर्ष न्यूजिल्यान्ड दुई स्थान माथि उक्लँदै तेस्रो सबैभन्दा सुरक्षित देश बनेको छ। यहाँ प्रदर्शन र आतंकवादसम्बन्धी घटनामा कमी आएको छ।

प्रशान्त महासागरको बीचमा रहेको यो द्वीपीय देश भौगोलिक रूपमा पनि बाह्य संघर्षबाट सुरक्षित छ। ग्रीनर पास्चर्स फर्मकी निर्देशक मिशा मैनिक्स ओपि भन्छिन्, ‘न्यूजिल्यान्डमा हतियारसम्बन्धी कानुन विश्वका सबैभन्दा कडा छन्, जसले नागरिकमा सुरक्षाको बलियो भावना जगाएको छ।’

उनका अनुसार यहाँका बच्चाहरू एक्लै स्कुल हिँड्छन्, मानिसहरूले ढोका खुला राख्छन्, र बाटोमा गाडी बिग्रिएमा राहगीर सहयोग गर्न थाम्दैनन्। यहाँका नागरिकहरू प्रकृतिसँग गहिरो सम्बन्ध राख्छन्, जस्तो समुद्रकिनारमा हिँड्ने, जंगलमा पैदल यात्रा गर्ने र तारा हेरेर बस्ने।

‘यहाँको वास्तविक सुन्दरताको मर्म मानिसहरूको स्वभावमा छ, माओरी संस्कृति, धैर्यता र जीवनको सन्तुलित गति नै यहाँको आत्मा हो,’ उनी भन्छिन्।

अष्ट्रिया
यो वर्ष अष्ट्रिया एक स्थान तल झरेर चौथो स्थानमा पुगेको छ, तर सुरक्षा, स्थिरता र सामाजिक कल्याणका क्षेत्रमा अझै अग्रणी छ। आयरल्यान्डझैं, अष्ट्रिया पनि संवैधानिक रूपमा तटस्थ देश हो।

यसले आफ्नो स्रोत र ऊर्जा आन्तरिक विकास र नागरिक कल्याणमा लगाउँछ। एसपीए होटल जागधोफका सञ्चालक आर्मिन फुर्चट्शेलर भन्छन्, ‘अष्ट्रियाको पुरानो तटस्थता नीति यसको वास्तविक शक्ति हो। यहाँका मानिसहरू आधीरातमा पनि नदी किनार हिँड्छन्, ढोका खुला राख्छन्, र क्याफे बाहिर साइकलहरू बिना ताला राखिन्छन्। “यहाँ सुरक्षा कुनै तथ्यांक मात्र होइन, जीवनको अनुभव हो। केही दिनमै मानिस तनावमुक्त हुन्छन् र प्रकृतिसँग एकाकार महसुस गर्छन्।’-बीबीसी