बिहार विधानसभा चुनावमा रेकर्ड मतदानले दिएको सन्देश

गया, बिहार,एएनआई। बिहार राज्यमा विधानसभा चुनाव २०२५ को पहिलो चरणमा ६५.०८ प्रतिशत मतदाताले मतदान गरेको रेकर्ड गरिएको बिहारका मुख्य निर्वाचन अधिकारी (सीईओ)ले शनिबार बताएका छन्।

बिहारका सीईआले भने, “विधानसभा चुनावको पहिलो चरण सन् २०२५ नोभेम्बर ६ मा राज्यका १८ जिल्लाका १२१ सिटहरूमा सफलतापूर्वक निर्वाचन सम्पन्न भएको थियो।

सीईओका अनुसार सन् २०२० को बिहार विधानसभा चुनावमा मतदाताको औसत सहभागिता ५७.२९ प्रतिशत थियो। जबकि, सन् २०२४ को लोकसभा आम चुनावमा ५६.२८ प्रतिशत मतदान भएको थियो। यसले अघिल्ला दुई चुनावको तुलनामा राज्यमा मतदाता सहभागितामा समग्रमा वृद्धि भएको देखाउँछ।

उनले भने, “यस वर्षको राज्यको चुनावमा सन् २०२० को बिहार विधानसभा आम चुनावको तुलनामा ७.७९ प्रतिशत बढीले मतदान भएको छ भने सन् २०२४ को लोकसभा आम चुनावको तुलनामा ८.८ प्रतिशतभन्दा बढीले मतदान भएको छ।

बिहार विधानसभा चुनावको दोस्रो चरण नोभेम्बर ११ मा हुने तय भएको छ, जसको मतगणना नोभेम्बर १४ मा हुनेछ। दोस्रो चरणमा, २० जिल्लाका १२२ सिटहरूमा मतदान हुनेछ।

यसैबीच, विधानसभा चुनावको प्रचारका लागि बिहार भ्रमणमा रहेका मध्य प्रदेशका मुख्यमन्त्री मोहन यादवले शनिबार एनडीएले पूर्ण बहुमतका साथ फेरि सरकार बनाउने दावी गर्नुभएको छ।

मुख्यमन्त्री यादवले बिहीबार (नोभेम्बर ६) मा भएको बिहार चुनावको पहिलो चरणमा एनडीए हावी भएको दावी गर्नुभयो।

मुख्यमन्त्री यादवले एएनआईसँग भने, “मतदाताको अत्यधिक सहभागिताले एनडीएले चुनावमा अग्रता लिइरहेको सङ्केत गर्छ। एनडीएले बिहारमा फेरि पूर्ण बहुमतका साथ सरकार बनाउनेछ। प्रधानमन्त्री नरेन्द्र मोदीको नेतृत्वमा हाम्रो पार्टीले दिल्लीमा सरकार बनाएको तरिकाले यहाँ फेरि हाम्रो सरकार बन्नेछ।“