इजरायलमा इरानको जवाफी आक्रमण, असर दुबई, कतार, बहराइन, कुवेत र ओमानसम्म

एजेन्सी: इरानमाथि इजरायल र अमेरिकाको संयुक्त आक्रमणले मध्यपूर्वलाई अशान्त बनाएको छ, जसको असर यस क्षेत्रभन्दा बाहिर पनि देखिएको छ। यो घटनाक्रम तीव्र गतिमा विकसित भइरहेको छ; यस घडीसम्मका मुख्य जानकारीहरू यहाँ छन्:

इजरायली रक्षा बल (आईडीएफ) ले आइतबार बिहान तेहरानका विभिन्न लक्ष्यहरूमा नयाँ चरणको आक्रमण सुरु गरेको छ। तस्बिरहरूमा सहरमाथि कालो धुवाँ मडारिएको देखिन्छ र बीबीसी पर्सियनले राजधानीमा विस्फोटका आवाजहरू सुनिएको जनाएको छ। इजरायली सञ्चारमाध्यमका अनुसार अघिल्लो दिनको आक्रमणमा सर्वोच्च नेता आयतोल्लाह अली खामेनीसहित कम्तीमा ४० अधिकारी मारिएको बताइएको छ।

इरानले त्यसको जवाफी आक्रमण सुरु गरेको छ। तेल अभिभका अधिकारीहरूका अनुसार इरानी ब्यालिस्टिक क्षेप्यास्त्र आक्रमणबाट इजरायलमा ४० वटा भवनमा क्षति पुगेको भनिएको छ। आक्रमणमा दुई जनाको मृत्यु भएको छ। इजरायलको एम्बुलेन्स सेवाले २० जनालाई अस्पताल लगिएको बताएको छ। देशभर साइरन बजाइएको थियो, तर हवाई रक्षा प्रणालीले अधिकांश क्षेप्यास्त्रहरूलाई आकाशमै खसालिदिएको दाबी गरेको छ।

इरानले दुबई, कतार, बहराइन, कुवेत र ओमानमा पनि हवाई आक्रमण गरिरहेको छ। उसले यस क्षेत्रमा रहेका अमेरिकी सैन्य आधारहरूलाई निशाना बनाएको हो। दुबईमा बस्ने एक बेलायती नागरिकले बीबीसीलाई भनेका छन्, ‘यो २४ घण्टा अत्यन्तै त्रासपूर्ण रह्यो। हामीले बम विस्फोटका आवाजहरू सुनिरहेका छौं र घर थर्किएको महसुस गरिरहेका छौं।’ जारी आक्रमणका कारण यस क्षेत्रको हवाई क्षेत्र बन्द गरिएको छ।

बेलायती रक्षा मन्त्री जोन हेलीले साइप्रसतर्फ दुईवटा इरानी क्षेप्यास्त्र प्रहार गरिएको बताएका छन्, जहाँ बेलायतका सैन्य आधारहरू छन्। यद्यपि, ती क्षेप्यास्त्रहरूले बेलायती सैन्य संयन्त्रहरूलाई निशाना नबनाएको अनुमान गरिएको छ। तर साइप्रसका अधिकारीहरूले भने आफ्नो दिशामा क्षेप्यास्त्रहरू आइरहेको कुरालाई खण्डन गरेका छन्।

इरानका घटनाहरूको असर अन्यत्र पनि परिरहेको छ। पाकिस्तानको कराँची सहरमा रहेको अमेरिकी वाणिज्य दूतावास बाहिर हिंसात्मक झडप भएको छ। इरानसँग ऐक्यबद्धता जनाउन सयौं मानिसहरू प्रदर्शनमा उत्रिएका थिए र प्रहरीसँगको झडपमा नौ जनाको मृत्यु भएको छ।