मतगणनाको प्रारम्भिक रुझान: देशभर ‘घण्टी’को जनलहर, पुराना दलका ‘हेबिवेट’नै संकटमा

काठमाडौँ: बिहीबार सम्पन्न प्रतिनिधिसभा निर्वाचनको मतगणना जारी छ। हाल ४१ वटा क्षेत्रको मतगणना चलिरहेकोमा प्रारम्भिक परिणाममा घण्टी चुनाव चिह्नसहित निर्वाचनमा सहभागी राष्ट्रिय स्वतन्त्र पार्टी (रास्वपा) निकै अगाडि देखिएको छ।

४१ वटा क्षेत्रमध्ये ३२ क्षेत्रमा रास्वपाले अग्रता बनाएकोमा नेपाली कांग्रेस र नेकपा एमालेले ४/४ क्षेत्र तथा नेपाल कम्युनिष्ट पार्टी (नेकपा)को एक ठाउँमा अग्रता देखिएको छ।

हालसम्मको अवस्था हेर्दा पुराना दलका हेबिवेट उम्मेदवार नै यसपालि विशाल मतान्तरले पराजित हुने सम्भावना देखिएको छ।

पूर्वप्रधानमन्त्री तथा नेकपा एमालेका अध्यक्ष केपी शर्मा ओली झापा ५ मा ठूलो अन्तरले पछि परेका छन्। यहाँ दुई हजार ३०३ मत गणना हुँदा रास्वपाका बालेन्द्र शाहले एक हजार ४७६ मत पाएका छन्। ओलीको मत ३८४ मात्रै रहेको छ।

चितवन २ मा रास्वपा सभापति रवि लामिछानेले एक हजार १५८ मत ल्याउँदा एमालेका अस्मिन घिमिरेले ९०७ र कांग्रेसकी मीनाकुमारी खरेलले ५३९ मत प्राप्त गरेकी छन्।

काठमाडौँ उपत्यकाका १५ निर्वाचन क्षेत्रमध्ये १४ वटा क्षेत्रमै रास्वपाले अग्रता कायम राखेको छ। काठमाडौँका १० वटै र भक्तपुरका २ वटै क्षेत्रमा तथा ललिपुरका तीनमध्ये दुई क्षेत्रमा रास्वपा अगाडि छ। नेपाल मजदुर किसान पार्टी (नेमकिपा)को गढ मानिने भक्तपुर १ मा नेमकिपाका प्रेम सुवाल फराकिलो मतले पछि परेका छन्। यहाँ रास्वपाका रकेश रञ्जीतले ३ हजार ४५२ मत ल्याउँदा  सुवालले १ हजार ९८२ तथा नेपाली कांग्रेसका किरण न्यौपानेले ५२९ मत प्राप्त गरेका छन्।

उपत्यकाको ललितपुर १ मा भने कांग्रेसका उदय शम्शेर राणाको अग्रता छ।

उज्यालो नेपाल पार्टीका अध्यक्ष कुलमान घिसिङ काठमाडौँ ३ मा पछि परेका छन्। रास्वपाका राजु पाण्डेले २ हजार ९६० मत पाउँदा घिसिङको मत २ हजार ८४६ रहेको छ।