चैत १२ गते अस्थायी हलमा ७८ वर्षीय केसीले खुवाउनेछन् नवनिर्वाचित सांसदलाई शपथ

काठमाडौँ: नवनिर्वाचित सांसदहरूको शपथग्रहण चैत १२ गते गराउने तयारी तीव्र पारिएको छ।

संघीय संसद् सचिवालयका प्रवक्ता सहसचिव एकराम गिरीका अनुसार चैत्र १२ गते शपथग्रहण कार्यक्रम आयोजना गर्ने तयारी भइरहेको छ। सिंहदरबारभित्र निर्माणाधीन नयाँ संसद् भवन अझै पूर्ण रूपमा तयार नभएकाले अस्थायी हल बनाएर कार्यक्रम सञ्चालन गर्ने तयारी गरिएको हो। शपथ कार्यक्रमका लागि हलमा माइक र बत्ती जडान लगायतका काम धमाधम भइरहेको छ।

जेनजी आन्दोलनका क्रममा पुरानो संसद् भवनमा आगलागी भएपछि वैकल्पिक स्थानको आवश्यकता परेको हो। सोहीअनुसार सिंहदरबारमा निर्माणाधीन भवनभित्रको बहुउद्देश्यीय हललाई अस्थायी रूपमा व्यवस्थापन गरिएको छ। उक्त हल केही दिनभित्रै पूर्ण रूपमा तयार हुने अपेक्षा गरिएको प्रवक्ता गिरीले जानकारी दिए।

नवनिर्वाचित सांसदलाई ज्येष्ठ सदस्यको हैसियतले नेपाली कांग्रेसका सांसद ७८ वर्षीय अर्जुननरसिंह केसीले शपथ खुवाउनेछन्। संसदीय परम्पराअनुसार ज्येष्ठ सदस्यलाई राष्ट्रपतिले शपथ खुवाउनेछन्। त्यसपछि ज्येष्ठ सदस्यले अन्य सदस्यहरूलाई शपथ गराउनेछन्।