तोरीबारीमा बसेर डिनर खाने पर्यटकीय गन्तव्य बन्दै चीन

काठमाडौँ: दक्षिण–पश्चिम चीनको सिचुआन प्रान्तस्थित चोङझाउमा वसन्त ऋतुको पालुवा र फूलहरूको आनन्द लिने एउटा नयाँ र लोकप्रिय तरिका सुरु भएको छ। यहाँका मानिसहरू अहिले पहेँलपुरै फुलेको तोरीबारीको बीचमा बसेर परिवार र साथीभाइसँग खानाको स्वाद लिइरहेका छन्।

चोङझाउको बइतोउ सहरका तोरीबारीहरूमा टेन्ट र टेबलहरू राखिएका छन्, जो चारैतिरबाट आकर्षक पहेँला फूलहरूले घेरिएका छन्। यहाँको मेनुमा विशेषगरी तोरीको मुना प्रयोग गरिएको ‘हटपट’ र तोरीका फूलहरूबाट बनेका अन्य परिकारहरू समावेश छन्।

तोरीबारीमा घुम्न आउने अधिकांश पर्यटकहरूले आफूहरू टाढा–टाढाबाट यहाँको दृश्य हेर्न र नयाँ स्वादका परिकार चाख्न आएको बताएका छन्। यहाँ घुम्न आएका एक पर्यटकले भने, ‘म यहाँ आउन एक घण्टाभन्दा बढी गाडी चलाएर आएँ। यहाँको दृश्य साँच्चै नै सुन्दर छ र हटपट पनि निकै स्वादिष्ट छ।’

त्यहाँ रहेको हटपट रेष्टुरेन्टका प्रबन्धक याङ स्यानगुईले भने, ‘हाम्रो हटपट रेष्टुरेन्ट निकै लोकप्रिय भइरहेको छ। विशेषगरी सप्ताहन्तमा, दिउँसो र बेलुकाको समयमा यो पूरै भरिभराउ हुन्छ। हामीसँग ठूला समूहहरूलाई सेवा दिन पर्याप्त टेबलहरू छन्।’ चोङझाउकै अन्य स्थानहरूमा भने पहेँलो तोरीबारीको बीचमा आकर्षक क्याफेहरू पनि सञ्चालनमा आएका छन्, जहाँ बसेर मानिसहरू कफी खान रुचाउँछन्, फोटो र सेल्फी खिच्छन्।

स्थानीय अधिकारीहरूले यस वर्ष नयाँ कार्यक्रमहरू पनि सार्वजनिक गरेका छन्। यहाँबाट करिब ५० किलोमिटर टाढा छेङ्दुमा रहेको विशाल पाण्डा हेर्न आउने पर्यटकहरूलाई आकर्षित गर्न यस्तो योजना ल्याइएको हो।

अहिले सहरहरूबीच नयाँ बस सेवाहरू सुरु गरिएको छ। साथै, तोरीबारी भ्रमणलाई अझै रोचक बनाउन ’पाण्डा थिम’ का कार्यक्रमहरू र शैक्षिक अनुभवहरूलाई पनि यस पर्यटन भ्रमणमा समावेश गरिएको छ।