‘मालती मंगले’ले पायो ‘युनिभर्सल’ प्रमाणपत्र, रामकृष्णको विवादित बयानले पर्नसक्छ असर

काठमाडौँ: सरकारले ‘सार्वजनिक पदाधिकारीको पदमुक्तिसम्बन्धी विशेष व्यवस्था अध्यादेश–२०८३’ जारी गरेपछि सेन्सर बोर्डका सदस्यहरू पदमुक्त हुँदा चलचित्रको जाँचपास कसरी हुने भन्ने विषयमा ठुलो अन्योल छाएको थियो। यद्यपि, यसै अन्योल र रिक्तताका बीच पनि नेपाली चलचित्र ‘मालती मंगले’को सेन्सर कार्य भने सफलतापूर्वक सम्पन्न भएको छ। २ घण्टा ३८ मिनेट लामो यस चलचित्रले सबैले हेर्न मिल्ने ‘युनिभर्सल’ प्रमाणपत्र प्राप्त गरेको छ। प्रमाणपत्र बुझ्न निर्माता तथा गायक रामकृष्ण ढकाल आफैँ पुगेका थिए। यो चलचित्र यही वैशाख २५ गते शुक्रबार रिलिज हुँदैछ।

सेन्सर बोर्डका सदस्यहरूको पदावधि मुक्त भएको अवस्थामा चलचित्र जाँचलाई अत्यावश्यक सेवा मानेर चलचित्र विकास बोर्डले पठाएको प्रतिनिधिको उपस्थितिमा सेन्सर गरिएको हो। यसका लागि चलचित्र विकास बोर्डका तर्फबाट दीपा बस्नेतलाई प्रतिनिधिको रूपमा पठाइएको थियो। जाँचपास समितिका अध्यक्षसहित विभिन्न मन्त्रालयका प्रतिनिधिहरू भने पदेन सदस्य रहने व्यवस्था भएको हुनाले उनीहरूको उपस्थिति भने कायमै थियो र सोही अनुरूप चलचित्रको सेन्सर कार्य अघि बढाइएको हो।

रानी फिल्म्सको ब्यानरमा युनि इन्टरटेन्मेन्टको सहकार्यमा निर्माण भएको चलचित्र ‘मालती मंगले’को कथा स्वयं निर्देशक प्रकु पाण्डेयले लेखेका हुन् भने पटकथा तथा संवाद संयोग गुरागाईँले तयार पारेका हुन्। यस चलचित्रमा विजय, वर्षा र मेक्समका साथमा प्रकाश घिमिरे, सरिता गिरी, नरिन थापा, मान्सु सापकोटा, सुस्मा निरौला, सुनिल तामाङ लगायतका थुप्रै कलाकारहरूको सशक्त अभिनय रहेको छ। चलचित्रको ट्रेलर तथा टिजरका साथै ‘सुनैको सपनी’, ‘ढुङ्गा माथि लेऊ’ र आकर्षक डान्सिङ नम्बर ‘झ्याम पारम’ जस्ता गीतहरू यसअघि नै सार्वजनिक भइसकेका छन् जसले दर्शकको राम्रो ध्यान तानेको छ।

यस चलचित्रका कार्यकारी निर्माता सागर ज्ञवाली हुन् भने बाबु सुवेदी, रबिन श्रेष्ठ, वेदना कर्माचार्य, पद्मावती गुरुङ, स्वीकृति बस्नेत र मिलन बजगाईँ सह-निर्माताका रूपमा रहेका छन्। प्राविधिक रूपमा पनि निकै उत्कृष्ट मानिएको यस चलचित्रमा महेश पौडेलको छायाङ्कन, रोमी मोजेजको सम्पादन, कृष्ण भण्डारीको रङ्ग संयोजन, सुजिल कर्माचार्यको ब्याकग्राउन्ड म्युजिक र डिकेश खड्गीको ध्वनि मिश्रण रहेको छ। आरआर फिल्म्सले वितरण गर्ने यो चलचित्रले यही शुक्रवारबाट दर्शकलाई पूर्ण मनोरञ्जन दिने विश्वास निर्माण पक्षले लिएको छ।

यो चलचित्रको निर्माण गायक तथा निर्माता रामकृष्ण ढकालले गरेका हुन्। ढकालले आफ्नै होम प्रोडक्सनको ब्यानरमा फिल्म निर्माण गरेका हुन्। चलचित्र प्रदर्शनको संघारमा रहँदा ढकाल भने आफ्नै बयानले सामाजिक सञ्जालमा आलोचनाको शिकार भैरहेका छन् भने कतिपयले उनको फिल्म बहिष्कार गर्ने ट्रेन्ड पनि चलाएका छन्।

जेनजी आन्दोलनताका भदौ २४ गते नख्खु कारागारबाट राष्ट्रिय स्वतन्त्र पार्टीका सभापति रवि लामिछानेलाई आफ्नो गाडीमा भगाएको प्रतिक्रियापछि उनको आलोचना भैरहेको छ। ‘मालती मङ्गले’को प्रमोसनका क्रममा उनले  प्रकाश सुवेदीको शो रजतपटमा रवि भागेको गाडी आफ्नो र ड्राइभर समेत आफू रहेको खुलासा गरेका थिए। उक्त भिडियो क्लिप यतिवेला सामाजिक सञ्जालमा तिव्ररूपमा फैलिरहेको छ।

शोमा लामिछाने नख्खुबाट सनरुफ कारमा हात हैल्लाउँदै निस्किरहेको भिडियो देखाउँदै प्रस्तोता सुवेदीले सोधेका थिए, ‘कसरी सम्झिनुहुन्छ?’ राम्रोसँग सम्झिन्छु भनी ढकालले जवाफ फर्काएपछि सँगै गेस्ट रहेकी वर्षा राउतले सोधेकी थिइन्, ‘गाडी तपाईँको हो?’

जवाफमा ढकालले भनेका छन्, ‘त्यही भन्नु पर्ला। जेनजी आन्दोलन एकदमै उत्कर्षमा थियो, त्यो दिन। र म भैँसी पार्टीमा बस्छु। जसले गर्दा हामी यताउता हिँडिरहेका थियौं। जुलुसमै थियौं। अनि।’

गाडी पनि आफैँले चलाएको भन्दै अगाडि उनी भन्छन्, ‘हो हो, ड्राइभ पनि मैले गर्या हो। रवि जी छुट्नुभयो भन्ने कुरा आयो। हामी त्यही तल गयौँ। गाडी चल्ने अवस्था थिएन। रविजी चाहिँ नख्खु जेलको पारी पट्टी एउटा रेस्ट्रोमा बसिरहनुभएको थियो। अनि म गए, एकदमै भिडभाड थियो। अनि म गएपछि हग गर्यौ। त्यसपछि एउटा राम्रो दिनमा भेट भयो भन्ने कुरा भयो। दाइ खुसी लाग्यो भने मैले। रविजीले पनि मलाई दाइ भन्नुहुन्छ। म पनि उहाँलाई दाइ भन्छु। उहाँलाई चाहिँ घर जानका लागि अप्ठ्यारो परिरहेको अवस्थाको स्थिति थियो। मलाई थाहा पनि थिएन, काठमाडौंमा यस्तो स्थिति भइरहेको छ भनेर। अलिअलि त हेरिरहेको थिए। त्यसपछि उहाँ गाडी नभएर त्यहाँ बसिरहनुभएको रहेछ। उहाँले गाडी छ भन्नुभयो, मैले छ भने। उहाँको आशिषजी सेक्रोटी इन्चार्ज, ह्वाई नट, गाडी भनेको हाम्रो लागि नै हो। गाडीभन्दा ठूलो हाम्रो जीवन हो।’

उनको यही अभिव्यक्तिका कारण उनी यतिवेला सामाजिक सञ्जालमा ट्रोल बनेका छन् भने कतिपयले फिल्म बहिष्कार गर्ने प्रतिक्रिया दिइहरेका छन्। यसले फिल्म प्रदर्शनीमा थोरै असर पर्ने देखिन्छ। यद्यपि कतिपयले भने ढकालको समर्थनमा आफ्नो मत राखिरहेका छन्।