विपक्षीको अवरोधपछि प्रधानमन्त्रीले जवाफ दिने दिन तोकेर संसद् स्थगित

काठमाडौँ: संसद्‌मा नीति तथा कार्यक्रममाथि उठेका प्रश्नको जवाफ दिन विपक्षी दलहरूले प्रधानमन्त्री खोजेपछि प्रतिनिधिसभाको बैठक स्थगित भएको छ। बिहान ११ बजे बसेको बैठकमा सभामुख डीपी अर्यालले प्रधानमन्त्रीका तर्फबाट अर्थमन्त्री डा स्वर्णिम वाग्लेले जवाफ दिन अनुमति दिएलगत्तै विपक्षी दलहरूले संसद् अवरोध गरेका थिए।

विपक्षीले संसद् अवरोध कायम राखेपछि सभामुख अर्यालले दुईपटक १५ मिनेटका लागि संसद् स्थगित गरेका थिए। दुवैपटक करिब १ घण्टाभन्दा लामो समयपछि संसद् बैठक पुन: सञ्चालन भए पनि विपक्षी दलहरूले आफ्नो माग यथावत राखी संसद् अवरोध गरेका थिए।

तेस्रो पटकमा पनि विपक्षी दलहरूले संसद् चल्न नदिएपछि सभामुख अर्यालले बिहीबार बिहान ११ बजेसम्मका लागि बैठक स्थगित गरेका हुन्।

सभामुख अर्यालले प्रधानमन्त्रीबाट जवाफ दिनका लागि समय समेत निर्धारणसमेत गरेका छन्।

उनले भने, ‘सम्माननीय राष्ट्रपतिको सम्बोधनमा उल्लेखित आर्थिक वर्ष २०८३/०८४ को लागि नेपाल सरकारको वार्षिक नीति तथा कार्यक्रममाथिको संशोधन प्रस्तुत गर्न, छलफलमा भाग लिन र सम्माननीय प्रधानमन्त्रीबाट जवाफ दिनका लागि समेत प्रतिनिधिसभा नियमावली २०७९ को नियम ३८ को उपनियम १ बमोजिम २०८३ साल वैशाख ३१ गतेको दिन तोकेको जानकारी गराउँदछु,’ सभामुख अर्यालले भने।

यद्यपि बिहीबार पनि प्रधानमन्त्री संसद्‌मा उपस्थित हुन्छन्/हुँदैनन् भन्ने अन्योल छ। नियमावलीको नियम ३८ मा ‘प्रधानमन्त्रीको अनुपस्थितिमा निजले तोकेको कुनै मन्त्रीसँग परामर्श गरी दिन र समयावधि तोक्नेछ र त्यसरी तोकिएको दिनमा दलीय प्रतिनिधित्वको आधारमा सम्बोधनमा उल्लिखित विषयमा छलफल हुनेछ’ भनिएको छ।

सोहीअनुसार प्रधानमन्त्री शाहले बुधबार उक्त जिम्मेवारी अर्थमन्त्री वाग्लेलाई सुम्पिएका थिए।