सुदन गुरुङ र महावीर पुनले लिए शपथ

काठमाडौँ: प्रधानमन्त्री वालेन्द्र शाहले तेस्रोपटक मन्त्रिपरिषद् विस्तार गरेका छन्। मंगलबार अपरान्ह सुदन गुरुङ र महावीर पुनले मन्त्रीको शपथ लिएका छन्।

राष्ट्रपति कार्यालयमा आयोजित विशेष समारोहमा राष्ट्रपति रामचन्द्र पौडेलले गुरुङलाई गृहमन्त्रीको र पुनलाई विज्ञान, प्रविधि तथा नवप्रवर्तनमन्त्रीको शपथ गराएका हुन्। प्रधानमन्त्री शाहको सिफारिसमा राष्ट्रपति पौडेलले आजै उनीहरूलाई मन्त्री नियुक्त गरेका हुन्।

पुन जेनजी आन्दोलनपछि पूर्वप्रधानन्यायाधीश सुशीला कार्कीको नेतृत्वमा बनेको अन्तरिम सरकारमा शिक्षामन्त्री बनेका थिए। तर बीचमै राजीनामा दिएर उनी प्रतिनिधिसभा सदस्यको उम्मेदवार बनेका थिए।

गुरुङ यसअघि शाह क्याबिनेटमा गृहमन्त्री भएकोमा सम्पत्ति शुद्धीकरणको मुद्दामा पक्राउ परेका व्यवसायी दीपक भट्टसँग कनेक्सन देखिएपछि २८ दिनमै गत वैशाख ८ गते राजीनामा दिएका थिए।

उनीविरुद्ध अनुसन्धान गर्न बनेको सरकारी समितिले गुरुङको गम्भीर त्रुटि नदेखिएको र सिस्टममै समस्या रहेको भन्दै प्रतिवेदन बुझाएको थियो।