इरानसँग शान्ति सम्झौतालगत्तै होर्मुज जलमार्ग खुल्ने ट्रम्पको दावी

एजेन्सी। अमेरिकी राष्ट्रपति डोनाल्ड ट्रम्पले इरानसँग शान्ति सम्झौतामा आइतबार (आज) हस्ताक्षर हुने र त्यसपछि तुरुन्तै होर्मुज जलडमरू खुल्ने दावी गरेका छन्।

‘सम्झौता भोलि (आइतबार) हस्ताक्षर हुने तालिका छ। र हस्ताक्षर भएको तुरुन्तै होर्मुज स्ट्रेट सबैका लागि खुला हुनेछ,’ ट्रम्पले सामाजिक सञ्जालमा भनेका छन्।

ट्रम्पले इरानमा अब आणविक हतियार चाहँदैन भनेर पनि दाबी गरे। उनले उपयुक्त समयमा युरेनियम हटाउन अमेरिकाले इरानसँग काम गर्ने सुझाव दिए।

उनले सम्झौतामा हस्ताक्षरले इरानसँगको अमेरिकी सम्बन्धलाई ‘भिन्न र राम्रो’ बनाउने बताए। तर, आफूहरुसँग अन्तिम विकल्प पनि रहेको उल्लेख गर्दै प्रक्रिया छिटो, सजिलै र सहज रूपमा अगाडि बढ्नुपर्ने बताए।

पाकिस्तानी विदेशमन्त्री मोहम्मद इशाक दारले पनि शनिबार अमेरिका–इरान सम्झौताको इलेक्ट्रोनिक हस्ताक्षर समारोह आइतबार हुने तय गरिएको बताएका छन्।

पाकिस्तानका प्रधानमन्त्री शेहबाज शरीफले पनि अमेरिका र इरान शान्ति सम्झौताको ढाँचामा सहमत भएका छन्। चाँडै नै यसमा हस्ताक्षर गर्ने अपेक्षा गरिएको उल्लेख गरेका छन्। पाकिस्तानले अमेरिका–इरान शान्ति वार्तामा मध्यस्थता गरिरहेको छ।

यद्यपि, इरानी विदेश मन्त्रालयका प्रवक्ता इस्माइल बखाईले आइतबार इरान र अमेरिकाबीच द्वन्द्व अन्त्य गर्न समझदारी पत्र (एमओय) मा हस्ताक्षर हुने कुरा अस्वीकार गरेको खबरहरु आएका छन्।

बखाईले इरान र अमेरिकाबीचको कुनै पनि सम्भावित एमओयू वार्ता जारी राख्नको लागि एक रूपरेखाको रूपमा काम गर्ने तर अन्तिम सम्झौता मान्न नसकिने जिकिर गरेका छन्। सीसीटीभीप्लस