पाँचथरमा बाढीपहिरोले ११९ परिवार विस्थापित

पाँचथर–पाँचथरमा बाढीपहिरोका कारण चार स्थानीय तहका ११९ घर परिवार प्रभावित भएका छन्। सुरक्षा निकायले संकलन गरेको तथ्याङ्कअनुसार बाढी पहिराका कारण जिल्लाका ११९ परिवारका ५७४ नागरिक प्रभावित बनेका हुन्। बाढीपहिरोका कारण १४ घर पूर्णरूपमा विस्थापित भएका छन्। पूर्ण विस्थापित हुने जिल्लावासीको संख्या ५९ छ।

जिल्लाका ८६ घर बाढीपहिरोको उच्च जोखिममा छन्। उच्च जोखिममा परेका ८६ परिवारका ४२५ नागरिक पनि विस्थापित भएका छन्। बाढीपहिरोका कारण १९ घरमा आंशिक क्षति पुगेको छ, जसकारण ९० जना नागरिक प्रभावित बनेको प्रमुख जिल्ला अधिकारी मेखबहादुर मग्र्रान्तीले जानकारी दिए। जिल्लामा हाल कुल ५७४ नागरिक आफ्नो घरबाट विस्थापित बनेको उनले बताए।

बाढीले यहाँका ६ वटा पक्की पुल बगाएको छ। यस्तै, एउटा बेलीब्रिज, आठ वटा झोलुंगे पुल र एउटा फलामको ट्रस पनि बाढीले बगाएको छ। पुलमा क्षति भएपछि मेची राजमार्गको फिदिम–ताप्लेजुङ खण्ड, तमोर करिडोरको माझीटार–ताप्लेजुङ खण्ड, मध्यपहाडी लोकमार्गको ओयाम–च्याङथापु खण्ड अवरुद्ध भएका छन्।

दर्जनौं ग्रामीण सडकको सवारी आवागमन प्रभावित बनेको छ। जिल्ला दैवी प्रकोप समितिले बाढी पहिराका कारण विस्थापित सबै परिवारसम्म राहत सामग्री पु¥याएको छ। पूर्ण विस्थापित परिवारका लागि लामो समय उपयोग गर्न सकिने पाल पनि जिल्ला आइपुगेकााले आजदेखि वितरण थालिने प्रजिअ मंग्रान्तीको भनाइ छ।

बाढीपहिरोले हालसम्म एउटा विद्यालय, तीन वटा गोठ, ४६ वटा चौपाया बगाएको तथ्यांक संकलन भएको छ। बाढीपहिरोका कारण जेसीबी मेसिन दुई वटा, एउटा ट्रयाक्टर, एउटा मोटरसाइकल, एउटा स्काभेटर र एउटा क्रसर मेसिन बगाएको छ। बाढीपहिरोका कारण यहाँका हजारौँ रोपनी क्षेत्रफलमा लगाइएको बालीमा क्षति पुगेको छ। यद्यपि बालीमा पुगेको क्षतिको विवरण संकलन भइनसकेको प्रजिअ मंग्र्रान्तीले बताए।

‘प्रहरी, स्थानीय तहका कृषि प्राविधिक तथा कृषि ज्ञान केन्द्रसमेतको समन्वयमा कृषि बालीमा भएको क्षतिको विवरण संकलन थालिएको छ,’ प्रजिअ मंग्रान्तले भने, ‘यथाशक्य चाँडो क्षतिको विवरण तयार पारी राहतका लागि उपल्ला निकायमा पहल थाल्नेछौँ।’

पाँचथरमा पहिरोले एक बालिका तथा बाढीले एक महिला र एक पुरुषको ज्यान गएको छ। बाढीमा परी अझैसम्म तीन जना बेपत्ता छन्। बेपत्ताको खोजीकार्य जारी रहेको र यसमा तमोर नदीको सीमावर्ती जिल्लाका सुरक्षा निकायसँग समेत समन्वय भइरहेको प्रजिअ मंग्रान्तीले जानकारी दिए।