मष्तिस्क विकास हुने उमेरका बालबच्चालाई मोबाइल दिएर नभुलाउन आग्रह

काठमाडौं– स्वास्थ्य मन्त्रालयले मष्तिष्क विकास हुने उमेरका बालबालिकालाई मोबाइलको लत नलगाउन आग्रह गरेको छ। मन्त्रालयले सूचना जारी गर्दै मष्तिष्क विकास हुने अधिकतम उमेरमा मोबाइलको लत लागे बालबालिकाको सर्वांगीण विकासमै असर पुग्ने हुँदा बालबालिकालाई मोबाइलको लत नलगाउन आग्रह गरेको हो।

बालबलिकाले आफैं मोबाइल नचलाउने तर अभिभावकले अत्यधिक मोबाइल प्रयोग गर्दा उनीहरुले देखेर सिक्ने हुँदा अभिभावकलाई पनि अत्यधिक मोबाइल नचलाउन मन्त्रालयले आग्रह गरेको छ। आफ्नो सजिलो र छिटोका लागि बालबालिकालाई मोबाइल देखाएर खानेकुरा नखुवाउन मन्त्रालयको सुझाव छ।

मोबाइल देखाएर बालबालिकालाई खाना खुवाउनाले बालबालिकाले आफूले कस्तो खानेकुरा खाँदै छु, कस्ता स्वादको खानेकुरा खाँदै छु भनेर थाहा नहुँदा भविष्यमा पोषण सम्बन्धित समस्या, पाचन प्रणालीमा समस्या हुन सक्ने सूचनामा उल्लेख गरेको छ।

खाना खुवाउँदा अभिभावकले बच्चासँग बोलेर, खेलेर, डुलाएर, गीत गाएर तथा उनीहरुको हाउभाउमा प्रतिक्रिया दिँदै खुवाउन मन्त्रालयले आग्रह गरेको छ।

मन्त्रालयका अनुसार मोबाइलमा लत लागेका बालबालिकामा एकोहोरो हुने लक्षण देखिँदै जान सक्छ । साथै, रिसाउने, झर्किन, रुने, दोहोरो कुरा नगर्ने, निद्रा ढिलो लागने, निद्रा पातलो हुने र निन्द्राबाट पटक–पटक ब्युँझने समस्या देखिने हुन सक्छ ।

मोबाइलमा लत लागेका बालबालिकामा बच्चा ठूलो हुँदै जाँदा झन् खान नमान्ने वा राम्ररी नचपाई खानेकुरा छिटो निल्ने पनि हुन सक्छ । साथै, सुत्नुभन्दा अगाडि मोबाइल हेरेका बालबालिकामा मोबाइल स्क्रिनबाट आउने उज्यालोले निद्रा लाग्ने हर्मोन उत्सर्जनमा समस्या हुने अध्यननले देखाएको छ।