कान्स हुँदै ओस्कर पुगेको फिल्मको कमाइ पुछारमा, हलमा चलिरहेका अन्य ४ फिल्मले कति कमाए?

काठमाडौँ: ७९औँ कान्स फिल्म फेस्टिभलको ‘अन सर्टेन रिगार्ड’ खण्डमा औपचारिक रूपमा छनोट भएर जुरी पुरस्कार जितेको नेपाली चलचित्र ‘तिनीहरू : इलिफेन्ट्स इन द फग’ अहिले नेपालका हलमा दोस्रो सातामा प्रदर्शनरत छ। कान्सको उक्त खण्डमा जुरी पुरस्कार जित्ने यो पहिलो नेपाली फिचर फिल्म हो।

अन्तर्राष्ट्रिय फेस्टिभलमा चर्चा बटुलेको ‘तिनीहरू’लाई नेपालबाट ९९औँ एकेडेमी अवार्ड (ओस्कार) को अन्तर्राष्ट्रिय फिचर फिल्म विधाका लागि आधिकारिक रूपमा सिफारिस गरिएको छ।

बक्सअफिसतर्फ कान्स र ओस्कारको उपलब्धि हासिल गरेको ‘तिनीहरू’को कमाइ अहिले सूचीको पुछारमा छ। आइतबार राति ११ः५९ बजेसम्मको विवरणअनुसार चलचित्रले १ करोड १६ लाख ४५ हजार ९७० रुपैयाँ आम्दानी गरेको छ। यसको ३३ हजार १३६ टिकट बिक्री भएको छ।

‘गौँथली’ले २५ करोड ९४ लाख ७३ हजार ४० रुपैयाँ आम्दानी गर्दै सबैभन्दा अगाडि रहेको छ। ‘पेन्सन पट्टा’ले ३ करोड ७९ लाख ७६ हजार ७४ रुपैयाँ, ‘बेहुली’ले २ करोड ६८ लाख २८ हजार ५२९ रुपैयाँ र ‘पार्वती’ले २ करोड २४ लाख ३२ हजार ८८३ रुपैयाँ आम्दानी गरेका छन्।