निफ्राको आठौँ वार्षिक साधारण सभा सम्पन्न, ५.२ प्रतिशत नगद लाभांश पारित

काठमाडौँः नेपाल इन्फ्रास्ट्रक्चर बैंक लिमिटेड (निफ्रा) को आठौँ वार्षिक साधारण सभा शुक्रबार काठमाडौंको बत्तिसपुतलीस्थित अनुपम फुडल्याण्ड एण्ड ब्याङ्क्वेटमा सम्पन्न भएको छ। सभाले बैंकको चुक्ता पुँजीको ५.२६३२ प्रतिशत नगद लाभांश वितरण गर्ने प्रस्तावसहित प्रस्तुत सम्पूर्ण प्रस्तावहरू सर्वसम्मतिले पारित गरेको छ।

बैंक सञ्चालक समितिका अध्यक्ष महेश प्रसाद दहालको अध्यक्षतामा सम्पन्न सभामा सञ्चालक समितिका सदस्यहरू बन्धु प्रसाद बाँस्तोला, सुरेन्द्रराज रेग्मी, दीपक कुमार अग्रवाल, विशाल उप्रेती, डा. मनिष थापा र अनिता रायमाझी तथा प्रमुख कार्यकारी अधिकृत कृष्णबहादुर अधिकारीलगायत शेयरधनी र सम्बन्धित पदाधिकारीहरूको उपस्थिति रहेको थियो।

सभालाई सम्बोधन गर्दै अध्यक्ष दहालले समीक्षा अवधिसम्म बैंकले हासिल गरेका उपलब्धि, चालु आर्थिक वर्षका लागि तय गरिएका योजना तथा लक्ष्य र भावी रणनीतिबारे शेयरधनीहरूलाई जानकारी गराएका थिए।

सभामा शेयरधनीहरूले बैंकका व्यावसायिक गतिविधिलाई थप प्रभावकारी बनाउँदै लगानीकर्ताको प्रतिफल वृद्धि गर्नुपर्नेमा जोड दिएका थिए। साथै, आगामी दिनमा संस्थागत सुशासन, पारदर्शिता र व्यावसायिक दक्षता अभिवृद्धि गर्दै बैंकलाई सबल वित्तीय संस्थाका रूपमा स्थापित गर्नुपर्ने सुझावसमेत दिएका थिए।

शुक्रबार बिहान ९ बजे सुरु भएको सभा करिब मध्याह्न १२ बजे सम्पन्न भएको बैंकले जनाएको छ।