वैदेशिक लगानी प्रतिबद्धता ५४ प्रतिशत घट्यो, १६ अर्ब २३ करोड मात्र

काठमाडौँः चालू आर्थिक वर्ष २०८३/०८४ को पहिलो तीन महिनामा नेपालमा प्रत्यक्ष वैदेशिक लगानी (एफडीआई) प्रतिबद्धता ५४ प्रतिशत घटेको छ।

उद्योग विभागका अनुसार साउनदेखि असोजसम्म १६ अर्ब २३ करोड रुपैयाँ बराबरको वैदेशिक लगानी प्रतिबद्धता स्वीकृत भएको छ। गत आर्थिक वर्ष २०८२/०८३ को सोही अवधिमा ३५ अर्ब १३ करोड रुपैयाँ बराबरको लगानी स्वीकृत भएको थियो।

लगानी प्रतिबद्धतामा गिरावट आए पनि उद्योग दर्ताको संख्या भने ४२२ पुगेको छ। विभागका अनुसार दर्ता भएका उद्योगमध्ये ४१० अटोमेटिक रुट र १२ अप्रुभल रुटबाट आएका हुन्। अटोमेटिक रुटबाट हुने दर्ताले तोकिएका सर्त पूरा गर्ने विदेशी लगानीका प्रस्तावलाई स्वचालित प्रक्रियाबाट अघि बढाउने व्यवस्था जनाउँछ।

संख्याका आधारमा सूचना प्रविधिमूलक उद्योगको बाहुल्य देखिएको छ। असोजसम्म यस क्षेत्रका २५२ उद्योग दर्ता भएका छन्। त्यस्तै पर्यटनमूलक १०८, सेवामूलक ३३ र उत्पादनमूलक २५ उद्योग दर्ता भएका छन्। ऊर्जा र कृषि क्षेत्रमा दुई–दुई उद्योग दर्ता भएको विभागको तथ्यांक छ।

तर, रकमका आधारमा पर्यटन क्षेत्रले सबैभन्दा बढी वैदेशिक लगानी आकर्षित गरेको छ। यस क्षेत्रमा ६ अर्ब ८ करोड रुपैयाँ बराबरको लगानी प्रतिबद्धता स्वीकृत भएको छ। ऊर्जा क्षेत्रमा ४ अर्ब र पूर्वाधारमूलक उद्योगमा ३ अर्ब ५७ करोड रुपैयाँ लगानी स्वीकृत भएको विभागले जनाएको छ। उत्पादनमूलक उद्योगमा १ अर्ब ६० करोड र सूचना प्रविधिमूलक उद्योगमा ९२ करोड ८३ लाख रुपैयाँ बराबरको लगानी प्रतिबद्धता स्वीकृत भएको छ।

दर्ता भएका उद्योगको आकार हेर्दा साना उद्योगको संख्या सबैभन्दा धेरै छ। कुल उद्योगमध्ये ४१७ साना, दुई मझौला र तीन ठूला उद्योग छन्। असोज महिनामा मात्रै ९४ उद्योग दर्ता भएका थिए भने ५ अर्ब १० करोड रुपैयाँ बराबरको एफडीआई स्वीकृत भएको थियो।