नारायणगढ–मुग्लिन सडक २० घन्टादेखि अवरुद्ध, हजारौं यात्रु अलपत्र

काठमाडौं– बिहीबार दिउँसोदेखि पहिरो खसेपछि अवरुद्ध नारायणगढ–मुग्लिन सडक अझै खुलेको छैन। अहिले सडक खुलाउने प्रयास जारी रहे पनि निरन्तर पहिरो खस्दा सडक अवरुद्ध भएको चितवन प्रहरीले जनाएको हो।

चितवनको इच्छाकामना गाउँपालिका–५ तीन नम्बर पुलमा सुक्खा पहिरो खसेपछि बिहीबार दिउँसोदेखि सडक बन्द भएको हो। त्यसपछि सुक्खा पहिरो खसे क्रम जारी छ। पन्छाउने तयारी गरिए पनि पहिरो खस्ने क्रम जारी रहेकाले बाधा पुगेको इलाका प्रहरी कार्यालय मुग्लिनका प्रहरी निरीक्षक विशाल तामाङले जानकारी दिए।

उनले पहिरो झरेर पहाड बनेको र पन्छाउन ५÷७ घन्टा लाग्ने बताए। ‘दिनभर पहिरो पन्छाएर पनि सडक सञ्चालन गर्न सक्ने अवस्था छैन’, तामाङले भने।

पहिरो झर्ने क्रम नरोकिएपछि बिहीबार राति पन्छाउने काम हुन सकेको थिएन। पहिरो पन्छाउन डोजर तयारी अवस्थामा राखिएको छ। सडकमा गाडीको लामो लाइन लागेको छ। सयौँ यात्रु समस्यामा छन्।

काठमाडौँबाट भरतपुरतर्फ आएका सवारीसाधन मुग्लिन र कुरिनटार क्षेत्रमा रोकिएका छन् भने नारायणगढबाट काठमाडौँ, पोखरातर्फ जाँदै गरेका सवारीसाधन जलबिरे क्षेत्रमा रोकिएका जिल्ला प्रहरी कार्यालय चितवनले जनाएको छ।

आज यात्रा गर्ने यात्रुलाई वैकल्पिक राजमार्ग प्रयोग गर्न जिल्ला ट्राफिक प्रहरी कार्यालयले अनुरोध गरेको छ। बर्खा लागेसँगै नारायणगढ–मुग्लिन सडक खण्डमा पटक–पटक पहिरो जाने र बाटो बन्द हुने गरेको छ।