अलमलमा समाजवादी मोर्चाः बैठकपिच्छे निर्णय फेरबदल

काठमाडौं– सत्तारुढ नेकपा माओवादी केन्द्रका अध्यक्ष एवं प्रधानमन्त्री पुष्पकमल दाहाल प्रचण्डको विशेष जोडबलमा जन्मिएको समाजवादी मोर्चा सुरुमै अलमलमा रहेको संकेत देखिएको छ। मोर्चाका परिकल्पनाकार बाबुराम भट्टराईलाई पाखा पारेर ४ असारमा राष्ट्रिय सभागृहमा तामझामसहित जन्माइएको मोर्चा अहिलेसम्म दिशाहीन अवस्थामै छ। समाजवादी मोर्चामा आबद्ध प्रधानमन्त्री प्रचण्ड र नेकपा एमालेबाट चोइटिएर छुट्टै दल खोलेका नेकपा एसका अध्यक्ष माधवकुमार नेपालले नेकपा ब्युँताएर सबै कम्युनिस्टलाई एउटै ओडारमा ल्याउनुपर्ने धारणा पटक–पटक बाहिर ल्याइरहेका छन्। नेकपा ब्युँताउँदा समाजवादी मोर्चाको अस्तित्व रहनेमा भने शंका छ।

सत्तारुढ गठबन्धनमा रहेका नेकपा माओवादी केन्द्र, जनता समाजवादी पार्टी, नेकपा एकीकृत समाजवादी र सत्ताबाहिर रहेको नेकपा कम्युनिस्ट पार्टी मिलेर समाजवादी मोर्चा घोषणा गरेका हुन्। राजनीतिक स्थिरताका लागि पार्टी एकतासम्मको उद्देश्य राखेर साझा प्रतिबद्धतामा रहेर समाजवादी मोर्चा घोषणा गरिए पनि उपेन्द्र यादवले एउटै पार्टी बन्न अस्वीकार गरेपछि मोर्चाको लामो समयसम्म एकै रहनेमा आशंका जन्मिएका छन्।

घोषणासभामा माओवादी केन्द्रका अध्यक्ष एवं प्रधानमन्त्री पुष्पकमल दाहाल, नेकपा एकीकृत समाजवादीका अध्यक्ष माधवकुमार नेपाल, जनता समाजवादी पार्टीका अध्यक्ष उपेन्द्र यादव र नेपाल कम्युनिष्ट पार्टीका महासचिव नेत्रविक्रम चन्दले समाजवादी मोर्चा नेपालको सहमतिपत्रमा संयुक्त हस्ताक्षर गरेर आफूहरु बलियो शक्ति रहेको घोषणा गरेका थिए। तर, सत्तारुढ कांग्रेसका दोस्रो तहका नेताहरु, रिसाएका बाबुराम र मूल प्रतिपक्षी एमाले अध्यक्ष केपी ओलीले सत्ता र शक्तिमा रहिरहन प्रचण्डले कांग्रेस, एमालेलाई बार्गेनिङ गर्न मोर्चा खोलेको आरोप लगाइसकेका छन्।

सुरुमा मोर्चा सञ्चालन गर्न तत्कालका लागि दुई तहको संरचना बनाउने तयारी भए पनि फेरिएको फरियै छ। शीर्ष नेताहरू रहने संयोजन समिति र प्रत्येक राजनीतिक दलबाट प्रतिनिधित्व हुने गरी सचिवालय गठन गरिने भनिएको थियो। मोर्चा सञ्चालनका लागि चार पार्टीमा आलोपालो अध्यक्ष प्रणाली लागू गरिने भनिएकाले अस्थिर हुने देखिन्छ। चार पार्टीबीच समाजवादी मोर्चा बन्दा ५४ सांसद भएका छन्। ५४ सांसद देखाएर प्रचण्ड, माधव नेपाल र उपेन्द्रहरुले सत्ताका लागि कांग्रेस र एमालेसँग बारम्बार बार्गेनिङ गर्ने निश्चित छ।

माओवादीका ३२, जसपाका १२ र एकीकृत समाजवादीका १० समाजवादी मोर्चाभित्र छन्। मोर्चामा समान विचार भएका अन्य दल थपिने बाटो खुला राखिएकाले संख्या बढ्न सक्ने दाबी गरे पनि बैठकपिच्छे निर्णय फेरिन थालेपछि मोर्चाको भविष्यमाथि शंका उब्जिएको छ।

हिजो मात्रै प्रधानमन्त्रीको सरकारी निवास बालुवाटारमा मोर्चाको बैठक बसेको छ। शनिबार दिउँसो ३ बजे बसेको बैठकले चार–चार महिनामा नेतृत्व परिवर्तन गर्ने निर्णय गरेको एकीकृत समाजवादीका उपाध्यक्ष राजेन्द्र पाण्डेले बताए। यसअघि ६–६ महिनामा नेतृत्व परिवर्तन गर्ने निर्णय गरेको थियो। यसबाट पनि मोर्चा दीर्घ नरहने संकेत देखिएको छ।

शनिबार बसेको बैठकले जिल्ला तहसम्म संरचना बनाउने निर्णय गरेको नेकपा एकीकृत समाजवादीका उपाध्यक्ष पाण्डेले बताए। बैठकले साउनको १२ गतेपछि सातै प्रदेशमा मोर्चाको आवश्यकता र औचित्य बुझाउने गरी भेला गर्ने निर्णय गरेको छ। समाजवादी मोर्चाको नेतृत्व आलोपालो प्रणालीअनुसार हुनेछ। मोर्चाको अध्यक्षता अहिले नेकपा समाजवादी एकीकृतका अध्यक्ष माधवकुमार नेपालले गरिरहेका छन्।