एक वर्षपछि कांग्रेस केन्द्रीय समिति बैठक, १० एजेन्डामाथि छलफल चलाइँदै

काठमाडौं–सत्तारुढ नेपाली कांग्रेसको केन्द्रीय कार्यसमिति बैठक ढिलो गरी एक वर्षपछि आजदेखि मुख्यालय सानेपामा बस्दै छ। तीन–तीन महिनामा बस्नुपर्ने बैठक गत वर्ष २८ असारदेखि २ साउनसम्म बसेको थियो। त्यसयता कांग्रेस केन्द्रीय समिति बैठक विभिन्न समयमा मिति घोषणा गरेर पनि बस्न सकेको थिएन। यसअघि २७ असारदेखि बस्ने भनिएको बैठक प्रधानमन्त्री पुष्पकमल दाहाल प्रचण्डपत्नी सीताको निधन भएपछि स्थगित गरेर आजलाई सारिएको हो।

बैठकमा वर्ष दिनका पार्टी निर्णय अनुमोदन गराउनेदेखि भ्रातृ संगठनसम्बन्धी गरेको निर्णय र विस्तारबारे छलफल हुने बताइएको छ। कांग्रेसले सांगठनिक स्वरुप र भ्रातृ संगठनलाई अझ पूर्णता दिन सकेको छैन। पार्टीभित्र राजनीतिक सवालमा द्विविधा निरन्तर छन्।  लथालिंग कांग्रेसका भ्रातृ संगठन पनि लथालिंगै अवस्थामा छन्। १० मध्ये ९ वटा संगठनले वैधानिकता गुमाइसकेका छन्। केही दिनअघि मात्रै सभापति शेरबहादुर देउवाले पार्टी निकट तरुण दलमा चार सय सदस्य थपेका थिए।

कांग्रेसकै निर्णयअनुसार नेविसंघ, तरुण दललगायतका १० भातृ संस्था विघटित अवस्थामा छन्। ३ फागुन २०७८ मा बसेको केन्द्रीय कार्यसम्पादन समिति निर्णयअनुसार १० वटा भ्रातृ संस्थाका तदर्थ समिति फागुन मसान्तभित्र पूर्णता दिनुपर्ने र तीनै तहका निर्वाचनको अन्तिम परिणाम आएको ३ महिनाभित्र महाधिवेशन सम्पन्न गर्नुपर्ने भनिएको थियो।

निर्वाचन परिणाम आएको तीन महिनाभित्र महाधिवेशन सम्पन्न गर्न नसके तदर्थ समिति स्वतः विघटित हुने निर्णय कांग्रेसको थियो। तर, अहिलेसम्म त्यसबारे कुनै निर्णय भएको छैन। सोमबार सभापति शेरबहादुर देउवा निवास धुम्बाराहीमा बसेको पदाधिकारी बैठकले तय गरेको एजेन्डाअनुसार कार्यसम्पादन समितिले गरेका निर्णय आज बस्ने बैठकमा अनुमोदन गरिनेछ। महाधिवेशन सम्पन्न गरेको ६ महिनामा गर्ने भनिएको नीति अधिवेशनबारे पनि बैठकमा छलफल बुझिएको छ। बैठकले सम्भवतः नीति महाधिवेशनको मिति र स्थान तय गर्नेछ।

कांग्रेसले गत वर्ष २७ असारदेखि २ साउनसम्म केन्द्रीय समिति बैठक गरेको थियो। त्यसपछि केन्द्रीय समिति बैठक बसेकै छैन। १४ मंसिर २०७८ मा १४औं महाधिवेशनले नेतृत्व मात्रै चयन गरेको थियो। ६ महिनाभित्र नीति अधिवेशन गर्ने भने पनि डेढ वर्षसम्म मिति तय हुन सकेको छैन। बैठकमा सरकारका काम–कारबाही, भ्रातृ संगठन विस्तारलगायत विषयमा छलफल हुनेछ।

केही दिनअघि मात्रै सरकार र पार्टीबीच समन्वय नहुँदा कांग्रेस थलिएको गुनासा ७७ वटै जिल्ला सभापतिको सानेपा भेलामा सुनिएका थिए। कांग्रेसमा २८ मध्ये प्रचार विभागले मात्रै पूर्णता पाएको छ। कांग्रेसमा १६८ सदस्यीय केन्द्रीय समिति रहने व्यवस्था छ। अझ केही केन्द्रीय सदस्य र कोषाध्यक्ष मनोनीत हुन बाँकी छ।

कांग्रेस नेता नैनसिंह महर सानेपा बैठकले पार्टीलाई सांगठनिक रुपमा ऊर्जा दिन सक्ने र भ्रातृ संगठनमा रहेको रिक्तताबारे ठोस निर्णय हुने अपेक्षा गरिएको बताउँछन्। उनले भने, ‘पोहोर असारपछि बल्ल आज केन्द्रीय समिति बैठक बस्न लागेको छ। बैठकले पार्टीभित्र देखिएका असन्तुष्टि, सरकारका कामकारबाही र भ्रातृ संगठनमा रिक्तताको अवस्थाबारे ठोस निर्णयमा पुग्नैपर्छ। कांग्रेसलाई सही दिशा दिन केन्द्रीय समिति बैठक फलदाय हुने अपेक्षा मात्रै हो।’

कांग्रेसले केन्द्रीय कार्यसमिति बैठक लाइभ गर्ने तयारी गरेको छ। सोमबारको पदाधिकारी र पूर्वपदाधिकारी बैठकमा सभापति शेरबहादुर देउवाले बैठक लाइभ गर्ने प्रस्ताव राखेका हुन्। उनको प्रस्ताव अनुसार एक वर्षपछि आज बस्न लागेको केन्द्रीय समिति बैठक लाइभ हुन सक्ने पूर्वमहामन्त्री शशांक कोइरालाले जानकारी दिए। ‘भोलि लाइभ गर्ने कि नगर्ने भन्ने विषयमा छलफल भयो। शेरबहादुरजीले नै प्रस्ताव राखेपछि छलफल गरेको हो,’ पूर्वमहामन्त्री कोइरालाले भने, ‘दुवै कुरा आएको छ। लाइभ गर्दा पनि हुन्छ भनिएको छ। अर्को कुरा लाइभ गर्दा ढुक्कले हृदयबाट बोल्न नसक्ने पनि कुरा आएको छ। भोलि गरौँ, हेरौँ भन्ने कुरा भयो। सायद भोलि सुरुमै लाइभ हुन्छ।’

पार्टीको फेसबुक पेजबाट प्रत्यक्ष प्रसारण गर्ने तयारी भएको सहमहामन्त्री फरमुल्लाह मन्सुरले जानकारी दिए। कांग्रेसले केन्द्रीय समितिको बैठक लाइभ गरे नेपाली राजनीतिमै नयाँ सुरुवात हुनेछ। अहिलेसम्म कुनै पनि राजनीतिक दलले आफ्ना बैठक लाइभ गरेका छैनन्। पदाधिकारी र पूर्वपदाधिकारी बैठकले केन्द्रीय समितिमा छलफलका लागि १० वटा एजेन्डा तयार गरेको छ।

तीमध्ये समसामयिक विषय (आर्थिक/परराष्ट्र/राजनीतिक), सांगठनिक कार्ययोजना र कार्यतालिका, केन्द्रीय समिति बैठक बस्दा कार्यसम्पादन समितिको निर्णय प्रस्ताव, निर्वाचन परिचालन समितिको प्रतिवेदन, नीति अधिवेशन, विभिन्न विभाग गठन, थप र कामको व्याख्या गर्ने कार्यसूची बैठकमा तय गरिएको छ।

यस्तै, राष्ट्रव्यापी अभियानको घोषणा, अनुशासन समितिको प्रतिवेदन पेस, संसद्मा सम्पादन भएका कामको प्रतिवेदन, सरकारका गतिविधिलगायत विषयमा पनि बैठकमा चर्चा हुनेछ। २०७८ मंसिरको १४औं महाधिवेशनमा शेखर कोइरालालाई हराउँदै देउवा दोस्रो पटक सभापति बनेका थिए। यसबीचमा तीन तहका चुनाव, दलीय गठबन्धनलगायत कारण जनाएर कांग्रेसले केन्द्रीय बैठक बसाल्न सकेको थिएन।