सत्तारुढ माओवादीको केन्द्रीय समिति बैठक आज पनि निरन्तर, नेतृत्वमाथि खबरदारी

काठमाडौं– बुधबारदेखि प्रज्ञा भवनमा तामझामसहित सुरु भएको सत्तारुढ नेकपा माओवादी केन्द्रको केन्द्रीय समिति बैठक दोस्रो दिन आज बिहान ११ बजेदेखि बस्दै छ। आजको बैठकमा पनि केन्द्रीय सदस्यहरुले आ–आफ्नो धारणा राख्नेछन्। पहिलो दिन बुधबारको बैठकमा १८ केन्द्रीय सदस्यले पार्टी अध्यक्ष एवं प्रधानमन्त्री पुष्पकमल दाहाल प्रचण्डबाट प्रस्तुत सांगठनिक, राजनीतिकलगायत एजेन्डामाथि रहेर आ–आफ्ना धारणा राखेका थिए।

केन्द्रीय समितिको चौथो पूर्ण बैठकमा अध्यक्ष एवं प्रधानमन्त्री पुष्पकमल दाहाल प्रचण्डको प्रतिवेदनमाथि १८ नेताले आ–आफ्नो धारणा प्रस्तुत गरेका छन्। बैठकमा मक्किँदै गएको पार्टीको पुनःनिर्माण, पार्टीको कार्यशैली, संगठनको प्रभावकारिता र सरकारका काम–कारबाहीबारे बैठकमा १८ केन्द्रीय सदस्यले आ–आफ्ना धारणा राखे। बुधबारको बैठकमा विभिन्न पाँच एजेन्डामा छलफल भएको प्रवक्ता कृष्ण बहादुर महराले बताए। केन्द्रयी कमिटी समावेशीअनुरुपको बनाउन र छुट्न गएकालाई समावेश गर्न लागिएको विषयमा छलफल भएको समेत उनले जानकारी दिए।

पार्टीलाई नयाँ जीवन दिने, संगठनात्मक संरचनालाई सानो बनाउने, पार्टीलाई पुनःजागृत गर्ने भन्ने विषयमा केन्द्रित भएर नेताहरूले धारणा राखेको माओवादीका केन्द्रीय सदस्य माधव सापकोटाले बताए। बैठकको प्रारम्भमा पार्टी अध्यक्ष दाहालले संगठनात्मक संरचनालाई चुस्त दुरुस्त बनाउने, पार्टी पंक्तिलाई वडास्तरमा फर्काउने, तीन महिनाको विशेष अभियान सञ्चालन गर्ने, विधान सम्मेलन गर्ने, सम्मेलनमार्फत पार्टीलाई चुस्त र व्यवस्थित तुल्याउने प्रस्ताव राखेका थिए।

बैठकमा अध्यक्षले राखेको प्रस्तावमाथि धारणा राख्न चाहेका नेतालाई नाम टिपाएका आधारमा पालैपालो बोल्न दिइएको थियो। बैठकको प्रारम्भमा सम्बोधन गर्दै अध्यक्ष दाहालले बैठकको आवश्यकता, राजनीतिक तथा सांगठनिक प्रतिवेदनका सन्दर्भमा धारणा राखेका थिए। माओवादीमा जम्बो केन्द्रीय समिति (४०७) जनाले पार्टी संगठन, स्वरुपबारे आ–आफ्ना विचार अभिव्यक्त गर्नेछन्।

यसअघि १९–२५ असार २०७९ सम्म माओवादीको केन्द्रीय समितिको तेस्रो बैठक बसेको थियो। त्यसयता बैठक बस्न सकेको थिएन। पार्टी अध्यक्ष प्रचण्डको नेृत्वमा वर्तमान सरकार गठन भएपछि गत २६ माघमा ‘भर्चुअल’रूपमा केन्द्रीय समिति बैठक बसेको थियो। माओवादी केन्द्रले २०७८ पुसमा आठौँ महाधिवेशन गरेको थियो।

मंसिरमा हुने विधान सम्मेलन, समसामयिक राजनीतिक विषय, सरकारमा पार्टीको सहभागिता तथा सरकारले गरेका काम कारबाहीबारे बैठकमा छलफल भइरहेको छ। बैठकमा ३८५ जना केन्द्रीय समिति सदस्य, १९८ वैकल्पिक सदस्य, केन्द्रीय आयोगका ७५ जना र प्रदेश पदाधिकारीबाट १०० जना गरी ७५८ सहभागी भइरहेको माओवादी केन्द्रीय कार्यालयले जनाएको छ।