चिकित्सा शिक्षा आयोगमा उपाध्यक्ष सिफारिस गर्न समिति गठन

काठमाडौँ- सरकारले चिकित्सा शिक्षा आयोगको उपाध्यक्ष नियुक्तिका लागि सिफारिस समिति गठन गर्ने निर्णय गरेको छ। साउन १६ गते बसेको मन्त्रिपरिषद् बैठकको निर्णय सार्वजनिक गर्दै सञ्चारमन्त्री रेखा शर्माले समिति गठन गर्ने निर्णय भएको जानकारी दिएकी हुन्।

समितिको सदस्य सदस्य पदमा प्राडा लोचना श्रेष्ठलाई नियुक्त गर्ने निर्णयसमेत भएको उनले बताएकी छन्। हालका उपाध्यक्ष श्रीकृष्ण गिरीको कार्यकाल सकिन लागेसँगै सरकारले नयाँ नियुक्तिका लागि प्रक्रिया सुरु गरेको हो।

‘चिकित्सा शिक्षा आयोगको उपाध्यक्ष नियुक्तिको लागि नाम सिफारिस गर्न सिफारिस समिति गठन गर्ने र सोही उपदफाको खण्ड (ग) बमोजिमको सदस्य पदमा नेपाली सेना स्वास्थ्य विज्ञान संस्थानका प्राडा लोचना श्रेष्ठलाई तोक्ने,’ मन्त्रिपरिषद् बैठकको निर्णयमा भनिएको छ।

लोक सेवा आयोगका अध्यक्ष संयोजक हुने समतिमा नेपाल सरकारका मुख्य सचिव वा निजले तोकेको प्रधानमन्त्री तथा मन्त्रिपरिषद्को कार्यालयको सचिवसमेत रहने व्यवस्था राष्ट्रिय चिकित्सा शिक्षा ऐन, २०७५ को दफा २३ मा उल्लेख छ। हाल लोक सेवा आयोगमा माधवप्रसाद रेग्मी अध्यक्ष छन्।

रेग्मीको संयोगजकत्वमा रहेको समितिले ३० दिनभित्र उपाध्यक्ष नियुक्तिका लागि तीन जनालाई सिफारिस गर्नुपर्ने छ। ती तीनजनामध्ये एक जनालाई सरकारले उपाध्यक्षमा नियुक्त गर्ने छ।