कोसीका मुख्यमन्त्री उद्धव थापाको परीक्षण हुँदै, सत्तापक्ष र विपक्षीले भत्काए राजनीतिक ‘इमान’

काठमाडौं– कोसी प्रदेश सभामुख बाबुराम गौतमलाई राजीनामा दिन लगाएर प्रदेशसभामा कुल ९२ संख्यामध्ये ४७ बहुमतसहित पुनः प्रदेशमा मुख्यमन्त्रीको दोस्रो कार्यभार सम्हालेका उद्धव थापाले आज विश्वासको मत लिँदै छन। गत १६ साउनमा मुख्यमन्त्री नियुक्त थापाले १३ भदौभित्र विश्वासको मत लिनुपर्ने कानुनी प्रावधानअनुसार आज प्रदेशसभामा विश्वासको मत लिने मिति तोकिएको हो। ।
सभामुखको हस्ताक्षर प्रयोग गरेर मुख्यमन्त्री भएका थापाको सरकारलाई सर्वोच्च अदालतले बदर गरिदिएपछि कोसीको राजनीति धमिलिन थालेको हो। मुख्यमन्त्री थापाले गठबन्धनको सरकार बचाउन सभामुखबाटै राजीनामा दिएका गौतमलाई पुरस्कारस्वरुप मन्त्री बनाए। सभामुखविहीन कोसी प्रदेशसभामा उपसभामुख एमालेकी सिर्जना दनुवार छन्। सरकारलाई ४७ संख्या बहुमतमा राखिराख्न मुख्यमन्त्री थापाले उपसभामुख दनुवारले राजीनामा दिने चर्चा चलिरहेका बेला ८० वर्षीय वयोवृद्ध प्रदेशसभाका ज्येष्ठ सदस्य गयानन्द मण्डललाई ३१ साउनमा कृषि राज्यमन्त्रीमा नियुक्त गरे। प्रदेशसभाका ज्येष्ठ सदस्य मण्डललाई
राज्यमन्त्रीमा नियुक्त गरेर विपक्षीलाई लोप्पा खुवाएका मुख्यमन्त्री थापाको रणनीतिलाई फेल गराउन एमाले र राप्रपाले प्रदेशसभा सञ्चालन गर्नुपर्ने ज्येष्ठ सदस्यहरुलाई विश्वास मत लिने बेला अनुपस्थित बनाउने रणनीति लिएका छन्।
उपसभामुखले राजीनामा दिए ज्येष्ठ सदस्य भएका कारण मण्डलले प्रदेशसभा बैठक सञ्चालन गर्नुपर्ने र विश्वासको मत लिँदा नपाउने अवस्था हटाउन मुख्यमन्त्री मण्डललाई राज्यमन्त्री नियुक्त गरे पनि उनीपछिका ७२ वर्षीय एमाले सांसद रोहितबहादुर कार्की पनि आज प्रदेशसभामा बिदा बसेका छन्।
यसअघि सरकार बनाउन सभामुखको हस्ताक्षर प्रयोग गरेको, सभामुखलाई राजीनामा दिन लगाएको र प्रदेशसभाका ज्येष्ठ सदस्य गयानन्द मण्डललाई बैठकको अध्यक्षता गर्न नदिन राज्यमन्त्री बनाएको आरोप लगाउँदै एमाले र राप्रपाले उपसभामुखदेखि ज्येष्ठ सदस्यसम्मलाई अनुपस्थित गराउने भएका हुन।्
केन्द्रमा निरन्तर सदन अवरोध गरेर आलोचनाको केन्द्रमा पर्दै आएको एमाले र उसलाई साथ दिएको राप्रपाले कोसी प्रदेशमा सत्ता पक्षलाई विश्वासको मत लिन नदिने, लिए पनि संख्या पुग्न नदिने बाटो समाएका छन्।
पूर्वमुख्यमन्त्रीसमेत रहेका एमाले संसदीय दलका नेता हिक्मत कार्की सत्तापक्षले सरकार टिकाउन सभामुखलाई राजीनामा गराएको र ज्येष्ठ सदस्यलाई राज्यमन्त्रीमा नियुक्त गरेकाले आफूहरुले पनि सोही बाटो पछ्याएको बताउँछन्। सत्तारुढले सरकार बचाउन चालेको कदमलाई प्रतिपक्षले छेक्न खोजेको उनको दाबी छ।
उनले भने, एमाले विधि र पद्धतिबाहिर जाँदैन। संसदीय विधिअनुसार अघि बढ्छ। सत्तापक्षले कल, बल, छल सबै हत्कण्डा प्रयोग गरिरहेको छ।’
प्रदेशसभामा सत्ता गठबन्धन कांग्रेस २९, माओवादी केन्द्र १३, नेकपा एकीकृत समाजवादीका ४ र जसपाका एक सांसद छन्। एमाले उपसभामुखसहित ४० र राप्रपाका ६ सांसद छन्।
थापा १६ साउनमा दोस्रोपल्ट मुख्यमन्त्री नियुक्त भएका थिए। थापा पहिलोपल्ट एमाले नेतृत्वको सरकारलाई हटाएर २१ असारमा मुख्यमन्त्री बनेका थिए। थापाले मुख्यमन्त्री दाबी गर्दा प्रदेश सभामुख गौतमको हस्ताक्षर प्रयोग गरेपछि सर्वोच्च अदालतले मुख्यमन्त्री पद बदर गरिदिएको थियो।
उपसभामुख दनुवारले बैठक सुरु हुने बेलासम्म राजीनामा दिने डरमा सत्तापक्ष छ।
प्रदेशसभा सचिवालयका अनुसार एमाले र राप्रपाका ज्येष्ठ सांसदले आइतबारै सचिवालयमा बिदा मागेका छन्। प्रदेशसभामा एमाले र राप्रपाका ज्येष्ठ सांसदले बिदा मागेपछि सभा चलाउन सत्तारुढ दलका सांसद आवश्यक पर्नेछ। एमालेका रोहितबहादुर कार्की (७१), मालतीकुमारी लिम्बू (६७), रामप्रसाद महतो (६७), तारादेवी ढकाल (६६), खड्गबहादुर बस्नेत (६७), किशोरचन्द्र दुलाल (६५) र ज्ञानेन्द्र सुवेदी (६४) ले भोलिको बैठकमा अनुपस्थित हुने सूचना प्रदेशसभा सचिवालयमा दिएका छन्।
मुख्यमन्त्री थापालाई विश्वासको मत लिनबाट रोक्ने योजनाअनुसार उनीहरु प्रदेशसभामा अनुपस्थित हुन लागेको बुझिएको छ। एमालेबाहेक राप्रपाका अम्बरबहादुर विष्ट (६८) र गोपालबहादुर विश्वकर्मा (६५) पनि भोलिको बैठकमा उपस्थित नहुने जानकारी गराएका छन्।
सत्तापक्षले सरकार टिकाउन सभामुख र ज्येष्ठ सदस्यलाई प्रयोग गरेपछि एमाले र राप्रपाले उपसभामुखदेखि ज्येष्ठ सदस्यसम्मलाई अनुपस्थित गराउन लागेका हुन्।
कोसीमा दोस्रो प्रदेशसभाको आठमहिने अवधिमा तीन वटा सरकार गठन भइसके पनि बहुमत नहुँदा निर्वाचन सन्निकट देखिएको छ।