भाइटीकाकै दिन किन स्थगित भयो ‘दिमाग खराब’को प्रदर्शन?

काठमाडौँ- गत शुक्रबारदेखि हलहरूमा लागेको फिल्म ‘दिमाग खराब’को प्रदर्शन स्थगित गरिएको छ। चलचित्र हलहरूसँग विमति राख्दै फिल्मको प्रदर्शन स्थगन गरिएको निर्माण कम्पनी सिनेमा आर्ट्सले विज्ञप्ति जारी गरी जानकारी दिएको छ। योसँगै नेपाली फिल्महरूमध्ये तुलनात्मक रूपमा राम्रो व्यापार गरिरहेको भनिएको फिल्म भाइटीकाकै दिनदेखि प्रदर्शनमा आउन रोकिएको छ।

नेपाली फिल्मलाई अन्यायपूर्ण व्यवहार गर्ने प्रवृत्ति रहेकाले त्यसको प्रतिवाद गरेको निर्माण पक्षको दाबी छ। नेपाली फिल्मलाई शोहरू नदिने दिमाग खराब पक्षको दाबी छ। यसका साथै बिक्रीबाट संकलन हुने आम्दानीमा पनि विदेशी चलचित्र समान नेपाली फिल्मलाई हिस्सा नदिने गरिएकाले त्यसको प्रदर्शन स्थगित गरिएको विज्ञप्तिमा उल्लेख छ।

अहिले बलिवुड फिल्म टाइगर-३ हलहरूमा लागिरहेको छ। सलमान खान, कट्रिना कैफ स्टारर टाइगर-३ सँग फिल्मले शो पाउनका लागि प्रतिस्पर्धा गर्नुपरेको थियो।

‘विगतदेखि हामी नेपाली चलचित्र निर्माताले प्रदर्शकहरूबाट सधैँ अन्यायपूर्ण व्यवहार खेप्दै आएका छौँ । विदेशी चलचित्रलाई बिना तर्क प्रशस्तै शोहरू दिने र दर्शकको अत्यधिक चासो भएको र दर्शकहरूले हेर्न खोजेका नेपाली चलचित्रलाई पनि आवश्यक शो नदिने प्रचलन पुरानै हो,’ विज्ञप्तिमा भनिएको छ, ‘पहिलो र दोस्रो हप्ता निर्माता र हल सञ्चालकमा हुने शेयर बाँडफाँड ५०%-५०% प्रतिशत हुन्छ। तर, तेस्रो हप्तादेखि निर्मातालाई ३५% र प्रदर्शकलाई ६५% शेयर बाँडिने कुरा पनि हामीले जाहेर गर्दछौँ। र, यो अन्यायपूर्ण व्यवहार निरन्तर जारी रहेको हुनाले हामीले प्रतिवाद गर्ने निर्णय गरेका छौँ।’

हलमा प्रदर्शन गर्ने वातावरण नरहे दर्शकलाई अन्य माध्यमबाट फिल्म देखाइने विज्ञप्तिमा उल्लेख छ।