हमासले रिहा गर्‍यो १७ बन्धक, इजरायलद्वारा ३९ प्यालेस्टाइनी कैदमुक्त

तेलअबिब- इजरायल र हमासबीच गाजामा युद्धविराम गर्ने समझदारी भएको दोस्रो दिन हमासले १७ बन्धक रिहा गरेको छ। शनिबार हमासले १३ इजरायली र ४ थाई बन्धकलाई मुक्त गरेको हो। बदलामा इजरायलले ३९ प्यालेस्टिनियन नागरिकलाई कैदमुक्त गरेको छ।

इजरायली डिफेन्स फोर्सले एक विज्ञप्ति जारी गर्दै हमासले १७ बन्धक रिहा गरेको पुष्टि गरेको छ। उनीहरूलाई रेडक्रसले इजरायल पुर्‍याई अस्पताल लगेको छ। युद्धविरामको पहिलो दिन हमासले २४ बन्धक र इजराइलले ३९ प्यालेस्टाइनीलाई रिहा गरेको थियो। योसँगै हमासले मुक्त गरेको बन्धकको संख्या ४१ पुगेको छ भने ७८ प्यालेस्टाइनी इजराइलको जेलबाट मुक्त भएका छन्।

युद्धविरामबीच गाजामा विभिन्न मुलुकहरूले मानवीय सहायता पुर्‍याइरहेका छन्। इन्धन, खाद्यान्न र औषधी लगायतका मानवीय सहायता इजिप्टलगायतका देशहरूबाट पुग्ने क्रम जारी छ।

इजरायल र हमासबीच पहिलो चरणमा ५० जना बन्धक र १५० जना कैदी छाड्ने सहमति भएको थियो। उक्त सहमतिलाई इजराइलको मन्त्रिपरिषद्ले अनुमोदन गरेको थियो। शुक्रबार बिहान गाजामा युद्धविराम छ।

हमासले प्रत्येक दिन कम्तिमा १० जना बन्धक मुक्त गर्ने र त्यसवापत इजरायलले गाजामा थप एक दिन युद्धविराम लम्ब्याउने समझदारी छ।

अक्टोबर ७ मा हमासले इजरायलमाथि आक्रमण गरी इजरायलसहित २६ देशका २३९ नागरिकहरूलाई बन्दी बनाएर गाजा लगेको थियो। जसमा नेपालका विपीन जोशी पनि छन्। हमासको आक्रमणमा इजरायलमा १० नेपाली नागरिकसहित १ हजार २ सय जना मारिएका थिए। त्यसयता इजराइलले लगातार गाजामा आक्रमण गरिरहेको थियो।

इजरायलको आक्रमणबाट गाजामा १४ हजारभन्दा बढी नागरिकहरूको मृत्यु भइसकेको छ। हमासले सबै बन्धकलाई मुक्त गरेपछि इजराइलले पुनः गाजामा आक्रमण गर्ने प्रधानमन्त्री बेन्यामिन नेतन्याहूले बताएका छन्।