बाबुलाई मारेपछि विश्वविद्यालय पुगेर १४ जनाको हत्या, गोलीबारीमा २५ घाइते

प्राग- चेक रिपब्लिकको राजधानी प्रागस्थित चार्ल्स विश्वविद्यालयमा एक युवकले १४ जनाको हत्या गरेका छन्। बिहीबार दिउँसो ती युवकले अन्धाधुन्ध गोली चलाउँदा थप २५ जना घाइते बनेका छन्।

राष्ट्रपति पेट्र पावेलले आफ्नो घटनाप्रति गहिरो दुख व्यक्त गरेका छन्। उनले निहत्था नागरिकले अनाहकमा ज्यान गुमाउनुपरेको भन्दै पीडा व्यक्त गरेका छन्।  घटनामा परी नागरिकले ज्यान गुमाउनु परेको भन्दै चेक रिपब्लिकले शनिबारका लागि राष्ट्रिय शोकको घोषणा पनि गरेको छ।

ती युवाले आफ्नै बाबुलाई पनि गोली हानी हत्या गरेको चेक प्रहरीको आशंका छ। गोलीबारी गर्ने युवा भने मृत फेला परेको प्रहरीको भनाइ छ।

गत हप्ता दुई व्यक्तिको मृत्युको घटनामा पनि उनी जोडिएको हुन सक्ने प्रहरीको आशंका छ।

युरोपेली देशमा पछिल्लो समय भएको यो सबैभन्दा नृशंश गोलीबारी हो। चेक प्रहरीले गोलीबारी गर्ने व्यक्तिको नाम र परिचय भने सार्वजनिक गरेको छैन।

चेक राजधानी प्रागको मध्यभागमा रहेको चार्ल्स विश्वविद्यालयको कला संकाय भवनमा बिहीबार स्थानीय समय अनुसार दिउँसो ३ बजे गोलीबारी सुरु भएको थियो।

बन्दुकधारीले भवनको प्यासेज र कक्षाकोठामा गोली हानेका थिए। जथाभावी गोली चलाउँदा ती व्यक्तिहरूको मृत्य भएको थियो। आतंकित बनेका विश्वविद्यालयका कर्मचारी र विद्यार्थीहरूले गोलीबाट जोगिनका लागि केही व्यक्ति फर्निचरको पछाडिपट्टि लुकेका थिए भने केही व्यक्ति झ्यालबाट निस्किएर हामफालेका थिए।

प्रहरीका अनुसार त्यसरी गोलीवर्षा गर्ने युवक भने सोही विश्वविद्यालयका विद्यार्थी थिए। उनी २४ वर्षका छन्। यसअघि उनको कुनै पनि आपराधिक रेकर्ड नभएको बताइएको छ। यद्यपि प्रहरीले भने उनको साथबाट ‘ठूलो हतियार र गोलाबारुद’ फेला परेको बताएको छ।

गोलीबारी हुनुअघि आत्मघाती आक्रमण नै गर्न सक्ने गरी सन्दिग्ध व्यक्ति प्राग पसेको रिपोर्ट प्रहरीलाई प्राप्त भएको थियो। त्यसको केही समयपछि नै ती युवकका बाबु मृत फेला परेका थिए।

बन्दुकधारी लेक्चर लिन आउन सक्ने आशंकामा प्रहरीले विश्वविद्यालयका थुप्रै भवनलाई खाली गराएको थियो। उनीहरूलाई संकायको मुख्य भवनमा राखिएको थियो।

गोली लागेर घाइते भएका २५ जनामध्ये १० जना गम्भीर छन्। तर प्रहरीतर्फ भने कुनै पनि अधिकारीलाई चोटपटक नलागेको प्रहरीले जनाएको छ।

चेकका प्रधानमन्त्री पेटर फियालाले यो घटनालाई भयानक भन्दै स्तब्ध भएको बताएका छन्।

‘एकातिर यो घटनाको निन्दा गर्न उपयुक्त शब्द भेटाउन पनि गाह्रो छ भने अर्कोतिर क्रिसमसअघिका यी दिनहरूमा हाम्रो सम्पूर्ण समाजले महसुस गरिरहेको पीडा र शोक व्यक्त गर्न पनि गाह्रो छ,’ फियालाको विज्ञप्तिमा उल्लेख छ।

उनले शनिबार शोकको दिन हुने बताउँदै सबै सार्वजनिक भवनमा झण्डा आधा झुकाउने र दिउँसो एक मिनेट मौनधारण गरिने बताए।

गोलीबारी भएपछि खेलकुद र सांस्कृतिक कार्यक्रम रद्द गरिएका छन्।

बिहीबार साँझ गोली हानाहान भएको ठाउँमा मानिसहरूले मैनबत्ती बालेर फूलहरू छोड्दै दिवंगतको शान्तिका लागि प्रार्थना गरेका छन्।

ती युवकले गोली चलाउनुको कारण भने अझै स्पष्ट हुन सकेको छैन।

रुसमा भएको यस्तै प्रकृतिको घटना भएको र त्यहीँबाट प्रेरित भएर यो घटना हुन पुगेको सामाजिक सञ्जालबाट पुलिसले सूचना प्राप्त गरेको छ। तर त्यसको विश्वसनीयता पुष्टि नभएको बताइएको छ।

यसअघी डिसेम्बर १५ मा प्रागको बाहिरी भागमा रहेको जंगलमा मृत फेला परेका एक युवक र उनको दुई महिनाकी छोरीको हत्यामा पनि उनै बन्दुकधारीलाई शंका गरिएको छ।

सन् १३४७ मा स्थापित चार्ल्स विश्वविद्यालय चेक गणतन्त्रको सबैभन्दा पुरानो र सबैभन्दा ठूलो विश्वविद्यालय हो। यो संस्था युरोपकै पुरानो विश्वविद्यालयमामध्ये एक हो।

बीबीसी