मालदिभ्सको संसदमा झडप, केही सांसद घाइते

काठमाडौँ- मालदिभ्सको संसदमा भएको झडपमा केही सांसद घाइते भएका छन्। अन्तर्राष्ट्रिय संचार माध्यायमका अनुसार ३ मन्त्री र एक महान्यायाधिवक्ता नियुक्तिको विषयलाई लिएर संसदमा झडप भएको हो।

चीनसँग निकट प्रधानमन्त्री मोहम्मद मुइज्जु नेतृत्वको गठबन्धन सरकारमा ३ मन्त्री र एक महान्यायाधिवक्ता नियुक्तिको प्रस्तावमा भारतसँग निकट प्रमुख प्रतिपक्षी दल मालदिभियन डेमोक्रेटिक पार्टी (एमडीपी)ले विरोध जनाएपछि झडप भएको हो।

प्रस्तावित मन्त्रीहरुको नाम संसदबाट पास गर्ने विषय नै झडपको कारण भएको अन्तर्राष्ट्रिय संचार माध्यायमले जनाएका छन्। बीबीसीका अनुसार विवाद यति धेरै बढ्यो कि सत्ता पक्ष र प्रतिपक्षीबीच हात हालाहाल नै भयो। कुटपिटबाट केही सांसदको टाउकोमा चोट लागेको छ। एक जना सांसदलाई त उपचारका लागि अस्पतालमै पुर्याउनु परेको छ। संसदमा भएको यो झडपको भिडियो सामाजिक सन्जालमा भाइरल छ।

मालदिभ्समा प्रोग्रेसिभ पार्टी अफ मालदिभ्स र पिपल्स नेशनल कांग्रेस (पीपीएम) र पीएनसीको गठबन्धन सरकार छ। ‘इण्डिया आउट’ नारा दिँदै चुनाव जितेका मोहम्मद मुइज्जु प्रधानमन्त्री छन्। अर्कोतर्फ मालदिभ्सको विपक्षी दल भारतसँग निकट छ। वर्तमान सरकारले भारतसँग सम्बन्ध बिगारेको भन्दै विपक्षी दलले सरकारको कडा आलोचना गर्दै आएको छ।