प्रहरी स्मारक गुठीको साधारणसभा सम्पन्न

काठमाडौँ- नेपाल प्रहरी स्मारक गुठीको ११औँ वार्षिक साधारणसभा आज सम्पन्न भएको छ। प्रहरी महानिरीक्षक वसन्तबहादुर कुँवरको प्रमुख आतिथ्यमा प्रहरी प्रधान कार्यालय नक्सालमा उक्त वार्षिक साधारणसभा सम्पन्न भएको हो।

सो अवसरमा प्रहरी महानिरीक्षक कुँवरले मानवीय सभ्यता र विकाससँगसँगै प्रादुर्भाव भएको प्रहरी हरेक विकट र विषम परिस्थितिमा सुम्पिएको उत्तरदायित्व तथा कर्तव्य निर्वाहमा सदैव समर्पित रहेको बताए। कैयौँ सदस्यको निःस्वार्थ बलिदान विषमपूर्ण घडिमा पनि अविचलित र दृढ रहन सक्ने इच्छा शक्तिको आधारशिलामा उभिएर नै नेपाल प्रहरीले आन्तरिक सुरक्षाको मेरूदण्डका रूपमा स्थापित हुन सफल रहेको उनले चर्चा गरे।

प्रहरी महानिरीक्षक कुँवरले अशक्त प्रहरी तथा आश्रित परिवारलाई सदैव साथ सहयोग होस् भन्ने भावनाले नै नेपाल प्रहरीको स्मारक गुठीको स्थापना भएको चर्चा गदै गुठीले नेपाल प्रहरीका अशक्त तथा आश्रित प्रहरी परिवारसँग एकआपसमा बाँध्न सक्ने भूमिका निर्वाह गरेको, कर्तव्यपालनाको सिलसिलामा वीर र अमर प्रहरीले पु¥याएको योगदान सदा स्मरणीय भइरहेको उल्लेख गरे। अक्षयकोष लक्षित वर्गप्रतिको सेवाप्रवाहमा थप कल्याणकारी योजना एवम् सृजनशील कार्यक्रम ल्याउनुपर्ने बताउदै लक्षित वर्गप्रति सेवा महसुस हुने गरी अक्षयकोषको परिचालन हुनुपर्नेमा उनले जोड दिए।

प्रहरी प्रधान कार्यालय कार्य विभागका प्रहरी नायब महानिरीक्षक भरतबहादुर बोहराले धन्यवाद ज्ञापन गरेका थिए भने प्रहरी निरीक्षक विकास तामाङले गुठीको संशोधित विधानको प्रस्तुतीकरण गरेका थिए।