नेपाल एसीसी प्रिमियर कपको फाइनलमा

काठमाडौँ- एसीसी प्रिमियर कप अन्तर्गत नेपाल र कुवेतबीचको सेमिफाइनल खेल भइरहेको त्रिवि क्रिकेट रंगशालामा पानी जमेर खेल हुन नसकेपछि नेपाल सिधै फाइनलमा पुगेको छ। वर्षाका कारण आजको खेल पूरा हुन नपाएपछि समूह चरण विजेता बनेका कारण नेपाल फाइनल पुगेको हो।

बिहान हल्का वर्षापछि अवरुद्ध भएको खेल ४२ ओभरमा झारेर छिटो सक्ने लक्ष्य राखिएपनि पुनः वर्षा भई मैदानमा पानी जमेपछि खेलको नजिता ननिस्किएपछि नेपाल फाइनलमा पुगेको हो।

प्रिमियर कपमा समूह चरणका खेल रद्द हुने नियम थियो। तर सेमीफाइनलमा त्यो सुविधा पनि थिएन। खेलमा नतिजा आउन नसकेपछि यसअघिको नतिजामा नेपाल समूह चरणमा विजेता भएको हिसाबले सिधै फाइनलमा प्रवेश गरेको हो।

मैदानमा पाल ओढाइएपनि वरिपरि पानी जमेका कारण पुनः खेल सञ्चालन गर्ने अवस्था रहेन। यसअघि ४२ ओभरमा झारिएको खेलमा नेपालले २८२ रनको लक्ष्य कुवेतलाई दिएको थियो। कुवेतले ८.३ ओभर खेलेर ३७ रन जोड्दा ६ विकेट गुमाएको अवस्था थियो।

कुवेत विरुद्ध सुरुमा कसिलो र घातक बलिङ गरेको नेपालले पावर प्ले नसकिँदै ६ विकेट गिराएको थियो। पेस बलर करण केसीले मात्र ५ विकेट गिराएका थिए। नेपाली टोलीका सोमपाल कामीले एक विकेट लिएपछि कुवेतले जम्मा ६ विकेट गुमाएको थियो।

Nepal has advanced to the final of the #ACCPremierCup as group leaders after the semi-final against Kuwait ended in a No Result. #NEPvKUW | #RoadToAsiaCup | #weCAN pic.twitter.com/9MqiZRLT5p

— CAN (@CricketNep) April 29, 2023

उता मूलपानी क्रिकेट मैदानमा भएको कपकै अर्को सेमिफाइनल खेलमा युएईले डीएल मेथडका आधारमा ओमानलाई २ रनले पराजित गरेको। युएईले दिएको २३७ रनको लक्ष्य पछ्याएको ओमानले ४३ ओभरमा ६ विकेट गुमाएर १९० रन बनाएको अवस्थामा वर्षा भएपछि खेल स्थगित भएको थियो।

अब नेपाल र युएईबीचको फाइनल खेल सोमबार हुनेछ। तेस्रो स्थानका लागि कुवेत र ओमानले आइतबार प्रतिस्पर्धा गर्नेछन्।