दिल्लीमा मुख्यमन्त्री बन्दै आतिशी, किन खुलाउन चाहन्नन् थर?

भारतको दिल्लीका मुख्यमन्त्री अरविन्द केजरीवालले राजीनामा दिने घोषणा गरेपछि नयाँ मुख्यमन्त्री आतिशी बन्ने भएकी छन्।

आम आदमी पार्टीका नेता गोपाल रायले मंगलबार मिडियाहरूलाई आतिशी मुख्यमन्त्री बन्ने निर्णय भएको जानकारी दिएका हुन्।

मुख्यमन्त्री हुने निश्चित भएपछि आतिशीले आफू मुख्यमन्त्री रहेसम्म आफ्नो एउटै मात्र लक्ष्य हुने बताएकी छन्।

‘अरविन्द केजरीवाललाई फेरि मुख्यमन्त्री बनाउने मेरो एउटै मात्र लक्ष्य हो। दिल्लीका जनताको रक्षा गर्ने कोसिस गर्नेछु। म केजरीवालको निर्देशनमा काम गर्नेछु,’ उनले भनिन्।

केजरीवालको राजीनामाबारे आतिशीले आफूलाई दुख लागेको बताइन्। ‘मलाई पनि अरविन्द केजरीवालले राजीनामा दिएकोमा दुःख लागेको छ,’ उनले भनिन्।

यसअघि गोपाल रोयले आफू कठिन परिस्थितिमा दिल्लीको मुख्यमन्त्री बन्न लागेको बताएका थिए।

‘बीजेपीले आम आदमी पार्टीलाई तोडेर सरकारलाई ढाल्ने प्रयास गरेको छ। तर हामीले उसको हरेक प्रयासलाई विफल पार्‍यौँ,’ उनले भनेका छन्।

अरविन्द केजरीवालले राजीनामा दिएपछि पार्टी संसदीइ दलको बैठकले आतिशीलाई नयाँ मुख्यमन्त्री बनाउने सहमति गरेको हो।

एमएलए बैठकमा अरविन्द केजरीवाल आफैंले आतिशीको नाम प्रस्ताव गरेका थिए।

अरविन्द केजरीवालले आइतवार आम आदमी पार्टी (आप) का कार्यकर्ताहरूलाई सम्बोधन गर्दै दुई दिनमा राजीनामा दिने बताएका थिए।

आतिशीबाहेक गोपाल राय र कैलाश गहलोतका साथै अरविन्द केजरीवालकी पत्नी सुनिता केजरीवालको नाम पनि मुख्यमन्त्री बन्ने सूचीको चर्चामा आएको थियो ।

तर अहिले ४३ वर्षीया आतिशीको नाम पारित भएको छ। आतिशी विधानसभा चुनावसम्म दिल्लीको मुख्यमन्त्री रहनेछन्।

केजरीवाल जेलमा रहँदा आतिशीले अधिकांश मन्त्रालय र विभागहरू सम्हालेकी थिइन्।

मनिष सिसोदिया शिक्षामन्त्री थिए। शिक्षा क्षेत्रमा उनले धेरै महत्वपूर्ण काम गरेको बताइन्छ। सिसोदियाको अनुपस्थितिमा शिक्षा विभाग पनि आतिशीले सम्हालेकी थिइन्। आतिशी केजरीवालको विश्वासपात्र मानिन्छन् ।

सन् २०२० को विधानसभा चुनावपछि केजरीवाल मन्त्रिपरिषदमा आतिशीसहित कुनै पनि महिलाले स्थान पाएका थिएनन्।

आतिशीलाई मन्त्रिपरिषदमा स्थान नदिएको भन्दै आलोचनासमेत भएको थियो।

गत चुनामा दिल्लीका ७० सिटमध्ये आम आदमी पार्टीले ६२ सिटमा जित निकालेको छ। तीमध्ये आठ जना महिला विधायक थिए। तर, सुरुको मन्त्रिपरिषदमा एक जना पनि महिला अटाएका थिएनन्।

मनिष सिसोदिया, सञ्जय सिंह र अरविन्द केजरीवाल जेल गएपछि आतिशीले सरकारदेखि पार्टीको नेतृत्व लिइन्।

सन् २०२३ मा आतिशी पहिलो पटक केजरीवाल सरकारमा शिक्षामन्त्री बनेकी थिइन्।

आतिशीलाई सन् २०१९ लोकसभा चुनावमा पूर्वी दिल्ली सिटबाट आम आदमी पार्टीले उम्मेदवार बनाएको थियो। त्यतिबेला उनी आतिशी मार्लेनाको नामले चिनिन्थिन्।

यसअघि आतिशी प्रायः पर्दा पछाडि रहेर काम गर्थिन्।

२०१९ को आमनिर्वाचनको पूर्वसन्ध्यामा एक्कासी भीड अगाडि अतिशीको हातमा माइक्रोफोन देखिएको थियो। उनी चुनावी राजनीतिमा ‘आप’की नेतृका रूपमा उदाइन्।

सोही चुनावको प्रचारप्रसारका क्रममा आतिशीले आफ्नो उपनाम ‘मार्लेना’लाई पार्टीका सबै अभिलेख र चुनावी अभियानसँग सम्बन्धित कागजातबाट हटाइदिइन्।

त्यतिबेला भारतीय जनता पार्टीले उनको उपनामका कारण विदेशी र क्रिश्चियन भनेर घेराबन्दीको प्रयास गरेको थियो।

यद्यपि, आतिषीले आफ्नो उपनाम हटाएको बताएकी थिइन्। किनभने उनी आफ्नो पहिचान प्रमाणित गर्ने अनावश्यक काममा समय बर्बाद गर्न चाहन्नथिन्।

आतिशीका आमाबाबु वामपन्थी झुकावका थिए। कार्ल मार्क्स र भ्लादिमिर लेनिनको नामका अक्षरहरू जोडेर आतिशीलाई ‘मार्लेना’ उपनाम दिइएको थियो।

आतिशीको उपनामको विवादका बीच मनिष सिसोदिया उनको बचाउमा उत्रिएका थिए र उनलाई ‘राजपुतानी’ भनेका थिए।

सिसोदियाले ट्विटमा लेखेका थिए, ‘मलाई दुःख लागेको छ- भाजपा र कांग्रेसले हाम्रो पूर्वीदिल्ली उम्मेदवार आतिशीको धर्मको बारेमा झुट फैलाइरहेका छन्। उनको पूरा नाम आतिशी सिंह हो। राजपूत वंशकी हुन्। असली क्षेत्रीय परिवारकी। झाँसीकी रानी हुन्। उनले चुनाव जितेर इतिहास रच्नेछिन्।’

तर २०१९ को चुनावमा आतिशी तेस्रो स्थानमा रहिन्। भाजपाको टिकटमा गौतम गम्भीरले चुनाव जितेका थिए।

आतिशीले आफ्नो एक्स ह्यान्डलबाट आफ्नो उपनाम पनि हटाएकी छन्।