शताब्दीकै सबैभन्दा ठूलो खोज! रुसले बनाएको क्यान्सरको खोपले कसरी गर्छ काम?

एजेन्सी – रुसले स्वास्थ्य मन्त्रालयले मंगलबार क्यान्सरको खोप बनाउन सफल भएको घोषणा गरेको छ। यो जानकारी रूसी स्वास्थ्य मन्त्रालयको रेडियोलोजी मेडिकल रिसर्च सेन्टरका निर्देशक आन्द्रेई काप्रिनले रेडियोमार्फत दिएका हुन्।

रुसी समाचार एजेन्सी टास (TASS) का अनुसार यो खोप अर्को वर्षदेखि रुसी नागरिकलाई निःशुल्क दिइने बताइएको छ। निर्देशक आन्द्रेईले रुसले क्यान्सर विरुद्धको आफ्नै mRNA (एमआरएनए) खोप विकास गरेको बताए।

रुसको यो खोजलाई शताब्दीकै सबैभन्दा ठूलो खोज मानिएको छ। खोपको क्लिनिकल परीक्षणहरूले देखाएको छ कि यसले ट्युमरको वृद्धि रोक्न मद्दत गर्दछ।

यस वर्षको सुरुमा रुसी राष्ट्रपति भ्लादिमिर पुटिनले रुस क्यान्सरको भ्याक्सिन बनाउने कामको नजिक पुगेको बताएका थिए। एमआरएनए वा मेसेन्जर RNA (आरएनए) मानव आनुवंशिक कोडको सानो भाग हो, जसले हाम्रो कोशिकाहरूमा प्रोटिन बनाउँछ।

यसलाई सरल भाषामा भन्दा जब कुनै भाइरस वा ब्याक्टेरियाले हाम्रो शरीरमा आक्रमण गर्छ, एमआरएनए प्रविधिले हाम्रो कोशिकाहरूलाई त्यो भाइरस वा ब्याक्टेरियासँग लड्न प्रोटिन बनाउने म्यासेज दिन्छ।

यसबाट, हाम्रो प्रतिरक्षा प्रणालीलाई आवश्यक प्रोटिन प्राप्त हुन्छ र हाम्रो शरीरमा एन्टिबडीहरू बन्छन्। यसको सबैभन्दा ठूलो फाइदा यो हो कि यसले परम्परागत खोपभन्दा छिटो खोप बनाउन सक्छ।

साथै शरीरको रोग प्रतिरोधात्मक क्षमता पनि मजबुत हुन्छ। एमआरएनए प्रविधिमा आधारित यो पहिलो क्यान्सर खोप हो।

खोप क्यान्सरअघि नभई पछि दिइने

क्यान्सर विशेषज्ञ एमडी मौरी मार्कम्यान भन्छन्, ‘क्यान्सरको खोप बनाउन जैविक रूपमा असम्भव छ। क्यान्सरको कुनै खोप हुन सक्दैन, किनभने क्यान्सर रोग होइन। यो शरीरमा हजारौं विभिन्न अवस्थाहरूको परिणाम हो। यद्यपि, खोपहरूले केही क्यान्सरहरूको रोकथाममा महत्त्वपूर्ण भूमिका खेल्छन्।’

यी खोपहरू उपचारको क्रममा क्यान्सर रोगीहरूलाई जोगाउन आवश्यक उपकरणहरू हुन्, किनभने क्यान्सर रोगीलाई उपचारको क्रममा अन्य रोगको जोखिम बढ्ने उनले बताए।

क्यान्सर भ्याक्सिनको विशेष पक्ष यो हो कि, यो क्यान्सर हुनुअघि कहिल्यै दिइनेछैन। बरु यो क्यान्सर ट्युमर भएका मानिसहरूलाई दिइन्छ। यो खोपले हाम्रो प्रतिरक्षा प्रणालीलाई क्यान्सर कोशिकाहरू कस्तो देखिन्छ भनेर पहिचान गर्न मद्दत गर्छ।