सपथअघि डोनाल्ड ट्रम्पले भने, ‘अब म युक्रेनमा युद्ध अन्त्य गर्नेछु’

एजेन्सी – डोनाल्ड ट्रम्पले आज अमेरिकी राष्ट्रपतिको रूपमा सपथ लिँदैछन्। सपथ ग्रहणअघि नै औपचारिक कार्यक्रम सुरु भएको छ।

सपथ ग्रहणअघि ट्रम्पले आफ्नो देशलाई पहिलेभन्दा अधिक महान् बनाउने बताएका छन्। उनले आफ्नो देशको गौरव पनि फर्काउने बताए। उनले वाशिंगटनमा मेक अमेरिका ग्रेट अगेन (मागा) र्‍यालीमा भने, ‘केही घण्टा बाँकी छ देशको गौरव फिर्ता ल्याउन।’

ट्रम्पले थपे, ‘अमेरिकामा चार वर्षको लामो पतनमा पर्दा खसेको छ। हामी अमेरिकी शक्ति र समृद्धि, सम्मान र गौरवको नयाँ दिन सुरु गर्दैछौँ।’

उनले प्रजातान्त्रिक क्याम्पबाट बाइडेन प्रशासनको कार्यकालमाथि प्रहार गर्दै भने, ‘हामी एकपटक र सधैंका लागि असफल, भ्रष्ट राजनीतिक प्रतिष्ठानको शासन अन्त्य गर्न लागेका छौं। अब हामी यो सहने छैनौं।’ कार्यक्रममा टेस्लाका मालिक एलोन मस्क पनि उपस्थित थिए।

र्‍यालीमा अभिनेता जोन भोइट र संगीतकार किड रकसहित धेरै सेलिब्रेटीहरू उपस्थित थिए।

‘रुस-युक्रेन युद्ध अन्त्य गर्छु’

ट्रम्पले रुस-युक्रेन युद्धको पनि उल्लेख गरेका छन्। उनले भने, ‘म युक्रेनमा युद्ध अन्त्य गर्नेछु, म मध्य पूर्वमा अराजकता रोक्नेछु र म तेस्रो विश्वयुद्ध हुनबाट रोक्नेछु र हामी तेस्रो विश्वयुद्धको कति नजिक छौं भन्ने तपाईलाई थाहा छैन।’

ट्रम्पले अमेरिकी बालबालिकामा पनि देशभक्तिको भावना बढाउने प्रयास गरिरहेका छन्। र्‍यालीमा उनले भने, ‘हामी हाम्रा विद्यालयमा देशभक्ति पुनर्स्थापित गर्न लागेका छौँ, कट्टरपन्थी वामपन्थी विचारधारालाई हाम्रो सेना र सरकारबाट बाहिर निकाल्छौँ।’