भारतमा चलिरहेको महाकुम्भमा भागदौड मच्चियो, १४ जनाको मृत्यु

एजेन्सी – भारतमा लागिरहेको महाकुम्भ मेलामा भागदौड मच्चिँदा १४ जनाभन्दा बढीको मृत्यु भएको छ।

मंगलबार राति अर्थात बुधबार बिहान करिब १ः३० बजे प्रयागराजको संगम तटमा भागदौड मच्चिएको हो। जहाँ ५० भन्दा बढी घाइते भएका भारतीय सञ्चारमाध्यमले लेखेका छन्।

स्वरूपण अस्पतालमा उपस्थित भास्कर संवाददाताका अनुसार पोस्टमार्टमका लागि १४ शव ल्याइएको छ। यद्यपि प्रशासनले मृतक वा घाइतेको संख्याबारे कुनै जानकारी दिएको छैन।

भागदौडपछि प्रशासनको आग्रहमा १३ वटै अखाडाले आज मौनी अमावस्याको अमृत स्नान रद्द गरेका छन्। अखाडा परिषद्का अध्यक्ष रवीन्द्र पुरीले भने–संगम नाकामा अत्याधिक भीडभाडका कारण यस्तो निर्णय गरिएको हो। प्रधानमन्त्री नरेन्द्र मोदी र गृहमन्त्री अमित शाहले मुख्यमन्त्री योगी आदित्यनाथसँग फोनमा घटनाबारे जानकारी लिएका छन्।

केही महिलाहरू भुइँमा लडेका र उनीहरूमाथि मानिसहरूहरू दौडिएका थिए। दुर्घटनापछि ७० भन्दा बढी एम्बुलेन्स घटनास्थल पुगेका थिए। घाइते र मृतकलाई अस्पताल लगिएको छ।

त्यहाँ भीड बढ्न नदिन प्रयागराज सहरमा पनि भक्तजनको आगमनमा रोक लगाइएको छ। त्यसका लागि सहरसँग सीमा जोडिएका जिल्लामा प्रशासनलाई सतर्क बनाइएको छ।

आज मौनी अमावस्याको महाकुम्भमा स्नान हुने भएकाले करिब ५ करोड भक्तजन नगरमा आउने अनुमान गरिएको थियो। प्रशासनका अनुसार राति अबेरसम्म संगमसहित ४४ घाटमा आठदेखि १० करोड भक्तजनले स्नान गर्ने अपेक्षा गरिएको थियो।

त्यसको एक दिनअघि अर्थात् मंगलबार साढे ५ करोडभन्दा बढी भक्तजनले संगममा स्नान गरेका थिए। पूरै सहरमा सुरक्षाका लागि ६० हजारभन्दा बढी सैनिक तैनाथ छन्।