५ तस्बिरमा ‘फेरि रेशम फिलिलि’को प्रिमियर

ललितपुर- शिवरात्रि (फागुन १४) देखि प्रदर्शनमा आउनलागेको फिल्म फेरि रेशम फिलिलीको प्रिमियर भएको छ।

ललितपुरको लबिम मलस्थित क्युएफएक्समा फिल्मको प्रिमियर गरिएको हो।

निर्माता अशोक शर्मा , निर्देशक निश्चल बस्नेत, नायिकाहरू स्वस्तिमा खड्का, रिचा शर्मा, शिल्पा मास्के, निर्देशक विशाल भण्डारी, निर्देशक कृशा चौलागाईँ, फुटबल खेलाडी किरण चेम्जोङ, कमेडियनहरू भरतमणि पौडेल, सुमन कार्की, सुमन कोइरालालगायतको उपस्थिति रहेको थियो।

२०७२ सालमा पहिलो पटक प्रदर्शन भएको ‘रेशम फिलिली’ ले आफ्नो ओपनिङ कलेक्सनमा कीर्तिमान कायम गरेको थियो। तर, भोलिपल्ट आएको विनाशकारी भूकम्पका कारण प्रदर्शन स्थगित भएर केही समयपछि पुनः रिलिज गरिएको थियो। त्यतिबेला फरक शैलीको कमेडी प्रस्तुत गरेको भन्दै चलचित्रको प्रशंसा गरिएको थियो।

करिब ९ वर्षपछि सिक्वेल आउने भएकाले दर्शकमाझ कौतुहलता बढेको छ। यो पटक सिनेमाले मुख्य पात्र रेशमले अमेरिकाको भिसा पाएपछि उत्पन्न परिस्थितिको कथा प्रस्तुत गरेको छ।

सिनेमामा विनय श्रेष्ठ, सुपुष्प भट्ट, कामेश्वर चौरासिया, नीर शाह, प्रकाश घिमिरे, शिशिर वाङ्देल, रविन्द्र झा, लक्ष्मी गिरी, महेश त्रिपाठी, एवनराज उप्रेती, मेक्सम गौडेल, सजन थापा लगायतका कलाकारहरूको अभिनय रहेको छ।

सुसन प्रजापतिको छायांकन, निरोज महर्जन र आकाश बरालको पटकथा, नरेश किङ्ग योगीको द्वन्द्व निर्देशन तथा कालीप्रसाद बाँस्कोटा, एसडी योगी, हर्क साउद, जयन जे वाइवा र दीपक शर्माको संगीत छ।

सिनेमाको सम्पादन सुरेन्द्र पौडेलले गरेका छन्।

सिनेमा आर्ट र वि मोसन पिक्चर्सको सहकार्यमा निर्माण भएको सिनेमाका रौनक विक्रम कँडेल निर्माता हुन् भने कार्यकारी निर्माता सुरज बम ठकुरी तथा सह-निर्मातामा एनी थापा रहेका छन्।

सिनेमाको निर्देशन/लेखन निरोज महर्जनले गरेका हुन्।

सिनेमाको पोस्टर डिजाइन ट्राइडेन्ट कन्सेप्टका रोयल भिमसेन ले गरेका हुन्।

सिनेमालाई गोविन्द शाहीको काफिया फिल्म्स र कुवेर सिने डिस्ट्रीब्युसन ले वितरण गर्दै छन्।