बानेश्वरका सडकमा ऐन खोज्दै शिक्षक [फोटो फिचर]

काठमाडौँ- शिक्षा ऐन ल्याउनुपर्ने माग गर्दै शिक्षकहरू आन्दोलनमा छन्। ऐन आउँदा आफूहरूसँग गरिएका पुराना सम्झौता कार्यान्वयन गर्नुपर्ने उनीहरूको मुख्य माग छ।

शिक्षकहरू माइतीघर मण्डलामा भेला भई नयाँबानेश्वर पुगी औपचारिक कार्यक्रम गर्दै छन्। शिक्षकहरूका मागका विषयमा कुराकानी गर्न कार्यवाहक प्रधानमन्त्री प्रकाशमान सिंहले वार्ताको पहल थालेका छन्। सिंहको कार्यकक्षमा शुक्रबार दिउँसो ३ बजेका लागि शिक्षक महासंघका पदाधिकारीहरूलाई छलफलका लागि बोलाइएको छ।

महासंघका एक पदाधिकारीले सिंहले आफूहरूलाई वार्तामा बोलाएको बताए। ‘हामीलाई बोलाइएको छ, तर सहभागिता बारे अन्तिम निर्णय भइसकेको छैन,’ उनले भने।

यसअघि बिहीबार पनि कार्यवाहक प्रधानमन्त्रीको अध्यक्षतामा सरकारी पक्षबीच आन्तरिक छलफल भएको थियो। त्यसैको निरन्तरता स्वरूप शिक्षक महासंघलाई छलफलमा बोलाइएको हो। शुक्रबारको बैठकमा गृहमन्त्री, प्रमुख सचेतक र मुख्य सचेतकसमेत सहभागी हुने बताइएको छ।

तर महासंघले सरकारले माग सम्बोधन नगरेसम्म वार्ताको आवश्यकता नरहेको संकेत दिएको छ। महासंघका सहअध्यक्ष तथा आन्दोलन परिचालन समिति संयोजक नानुमाया पराजुली भन्छिन्, ‘हामी पहिल्यै सहमत भएका थियौं। अब शिक्षा ऐन जारी गरियोस्, हामी आफैं घर फर्किन्छौं।’

यद्यपि, कार्यवाहक प्रधानमन्त्रीसँगको छलफलमा सहभागी हुने कि नहुने भन्नेबारे महासंघ आन्तरिक सल्लाहमा जुटिरहेको छ।

२० चैतदेखि शिक्षा ऐन कार्यान्वयनको माग राख्दै देशभरका शिक्षकहरू काठमाडौँमा विरोध प्रदर्शनमा छन्।

तस्बिर : नेपाल फोटो लाइब्रेरी