रुससँग युद्धरत युक्रेनले भन्यो- भारत र पाकिस्तान दुवैले संयम अपनाउनू

किभ- रुससँग युद्धरत युक्रेनले भारत र पाकिस्तानलाई संयम अपनाउन र कूटनीतिक वार्तालाई प्राथमिकता दिन आग्रह गरेको छ।

दक्षिण एसियामा सुरक्षाको अवस्थालाई थप बिगार्न सक्ने कदमबाट बच्न पनि उसले दुवै देशलाई आग्रह गरेको हो।

युक्रेनी विदेश मन्त्रालयले घटनाक्रमलाई नजिकबाट नियालिरहेको र यस क्षेत्रमा शान्ति तथा स्थिरता सुनिश्चित गर्नका लागि अन्तर्राष्ट्रिय पहल र प्रयासको समर्थन गरिने उल्लेख गरेको छ।

‘भारत र पाकिस्तानबीच बढ्दो तनावको सन्दर्भमा हामी दुवै पक्षलाई संयम अपनाउन र कूटनीतिक वार्तामा संलग्न हुन आह्वान गर्दछौँ। दक्षिण एसियाली क्षेत्रमा सुरक्षाको अवस्थालाई बिगार्न सक्ने कार्यहरूबाट बच्न र विवादहरूको शान्तिपूर्ण समाधानको काम गर्नु महत्त्वपूर्ण छ,’ युक्रेनी विदेश मन्त्रालयले भनेको छ।

त्यस्तै, बेलारुसले पनि भारत-पाकिस्तानबीच बढ्दो तनावमा चिन्ता व्यक्त गरेको छ। समस्याय समाधानका लागि वार्ता र शान्तिपूर्ण उपायहरू अपनाउनुपर्नेमा जोड दिनुपर्नेमा उसको जोड छ।

भारतको पहलगाममा एक जना नेपालीसहित २६ जनाको हत्या गरिएपछि भारतले पाकिस्तानमाथि ‘अपरेसन सिन्दूर’ नाम दिएर आक्रमण गरेको हो। बुधवार बिहानबाट सुरु गरिएको यो आक्रमणमा पाकिस्तानका ९ ‘आतंकवादी’ केन्द्रमा आक्रमण गरिएको भारतको दाबी छ। २४ मिसाइल प्रहार गरी गरिएका यी आक्रमणमा पाकिस्तानतर्फ सय जनाको मृत्यु भएको भारतीय पक्षको दाबी छ।

यसैबीच भारतको केन्द्र सरकारले बिहान ११ बजे संसदको पुस्तकालय भवनमा सर्वदलीय बैठक बोलाएको छ। बैठकमा अपरेसन सिन्दूरका विषयमा जानकारी गराइने बताइएको छ। पहलगाम हमलापछि भारत सरकारले दोस्रो पटक सर्वदलीय बैठक बोलाएको हो।

उता रूस तीन दिनका लागि युद्धविराम गरेको छ। यसको बदलामा युक्रेनले पनि युद्धविराम गर्ने विश्वास रुसको छ। विक्ट्री डे परेडलाई दृष्टिगत गरी मे १० सम्मका लागि युद्धविरामको घोषणा गरिएको हो।