‘बाटुलो जूनभित्र’ अनमोल अनुहार, चल्ला त नयाँसँगको जादू?

काठमाडौं– नम्रतम् मिजास र ‘गुड लुकिङ’ भएर पनि अभिनय क्षमताको कसीमा सधैं मिश्रित प्रतिक्रियाका भागी बनिरहेका अभिनेता अनमोल केसी ‘बाटुलो जून’ नामक नयाँ फिल्ममा देखिने भएका छन्। यो फिल्म उनका लागि झण्डै–झण्डै ‘घरेलु प्रोजेक्ट’ जस्तो हो।

सिनेमा चयनमा अत्यन्त्यै ‘चुजी’ र महंगो पारिश्रमिक लिने कलाकारका रुपमा चिनिएका अनमोलका लागि नयाँ फिल्म भने सस्तो बजेटको हुनेछ। ‘उनले अभिनय गर्ने बाटुलो जूनको बजेट नै २५ लाख रहनेछ’ अनमोल जोडिएको नयाँ फिल्मी परियोजना निर्माण टिमका एक सदस्यले भने, ‘कम्तिमा ५० लाख लिने अनमोलका लागि यो फिल्मको अनुभव धेरै कारणले अलग रहनेछ।’

नयाँ फिल्मको अर्को नयाँ विशेषता के हो भने, यसमा अभिनेता अनमोल डेब्यु अभिनेत्रीसँग जोडिनेछन्। टिकटकमा निकै नै लोकप्रिय रहेको जुम्ल्याहा जोडीमध्येकी प्रिन्सी पहिलो पटक अनमोलसँग जोडी बन्दैगरेको खबर फिल्म घोषणासँगै बाहिरिएको छ। प्रिन्सी मोडल पनि हुन्। उनले यसअघि म्युजिक भिडियोमा पनि काम गरिसकेकी छिन्। प्रिन्सीलाई अडिसनमा सहभागी भएका एक दर्जन बढी युवतीमध्येबाट छनौट गरिएको दाबी निर्माण पक्षको छ। फिल्ममा प्रिन्सीको भूमिकाका विषयमा भने धेरै कुरा खुलाइएको छैन। यद्यपी उनी अनमोलसँगै पर्दामा देखिनेछिन्।

‘मेरा लागि यो सुनौलो अवसर हो। यसबाट म उत्साहित छु’ नायक अनमोल केसीसँग जोडी बाँधेर फिल्म क्षेत्रमा डेब्यू गर्न पाउँदा प्रिन्सी उत्साहित छिन्। भन्छिन्, ‘मिहिनेत गर्नेछु।’ अनमोलका आफ्नै बाबु तथा पुराना कलाकार भुवन केसीको निर्देशनमा बन्न लागेको ‘बाटुलो जून’की फिल्मकी निर्मात्री जीया केसी हुन्। जीया भुवन केसीसँग सन्निकट मित्र हुन्।

भदौमा छायाँकनमा जाने यो फिल्ममा अर्की एक नायिका पनि रहने बताइएको छ। तर, अर्की एक नायिकाको छनोट हुन बाँकी रहेको वुझिएको छ। तर फिल्म घोषणाले भने फिल्मवृत्तमा एक प्रकारको तरंग पैदा गरेको छ। ‘अनमोलको करिअरमा उनलाई अलिक अधिक चर्चित फिल्मको जरुरी देखिएका बेला यो फिल्म सबैका लागि प्रतिक्षाको विषय हो’, टिमसँग जोडिएका एक सदस्यले भने, ‘बाहिरको फिल्मले करिअर अलिक उकालोमा गएन भनेर नै भुवन केसी दाइले अनमोलका लागि यो प्रोजेक्ट बनाउनुभएको हो।’ गाउँले पात्रमा प्रतिविम्बित हुन यो फिल्मको ‘गेटअप’ लागि अनमोलले दाह्री र जुँगा समेत पालेका छन्।

‘होस्टल’ बाट नेपाली सिने क्षेत्रमा डेब्यु गरेका अनमोल केसीले पहिलो सिनेमाबाट जति सफलता पाए त्यसपछिका एकाध वाहेकका फिल्महरु भने उनका लागि त्यत्ति अपेक्षाकृत सावित हुन सकेनन्। आधा दर्जनभन्दा बढि फिल्ममा अभियन गरेका अनमोलका लागि ‘बाटुलो जून’ कस्तो होला भन्ने जिज्ञासा भने फिल्म घोषणासँगै सबैमा व्याप्त छ।