‘लालीबजार’मा स्वस्तिमाको गर्भवती लुक्स

काठमाडौँ- ‘जात्रा’ शृङ्खलामार्फत स्थापित भएको ब्यानर षट्कोण आर्ट्सले निर्माण गर्ने नयाँ चलचित्र ‘लालीबजार’मा अभिनेत्री स्वस्तिमा खड्का अनुबन्धित भएकी छिन्। निर्माण पक्षले आज एक पोस्टर सार्वजनिक गर्दै अभिनेत्री खड्काको सो चलचित्रमा अभिनय रहने बताएको छ।

अभिनेत्री खड्काले आफू देखिएको पात्रभन्दा भिन्न रहेकाले चलचित्रमा अभिनय गर्न लागेको बताएकी छन्। ‘अघिल्ला चलचित्रको तुलनामा यसपटक फरक स्वस्तिमालाई देख्नुहुनेछ। अभिनेत्रीका रुपमा हामीलाई फरक काम गर्ने इच्छा हुन्छ तर, त्यस्तो भूमिका र विश्वसनीय निर्माण समूह कमै पाइन्छ। यसपटक कथावस्तुसहित समग्र विषय उपयुक्त भएकाले काम गर्न लागेकी हुँ,’ उनले भनिन्।

सार्वजनिक पहिलो झलकमा उनी गर्भवतीको चरित्रमा देखिएकी छिन्। कलाकार तथा निर्माता रवीन्द्रसिंह बानियाँले मनोरञ्जनसँगै सामाजिक विषयलाई चलचित्रमा देखाइने जानकारी दिए।

‘जात्रा’, ‘जात्रै जात्रा’, ‘महापुरुष’ र ‘महाजात्रा’ निर्माण गरेर दर्शकको विश्वास जितिसकेकी छन्। ‘चलचित्र ‘लालीबजार’ का निर्देशक तथा यम थापाले आइरहेकाभन्दा भिन्न विषयलाई पर्दामा ल्याउन लागिएको छ,’ उनले भने।

‘यो विषय भिन्न छ, हामीले अहिले सबै कुरा खुलाउन सक्दैनौँ। तर, स–परिवार हेर्न मिल्ने हाम्रो समाजकै एउटा महत्वपूर्ण विषयलाई समेटेर चलचित्रको कथा तयार गरिएको छ। यसअघिका भन्दा यो चलचित्र अलि भिन्न बनाउन सक्दो प्रयास हुनेछ,’ निर्देशक थापाले भने।

निर्माता बानियाँ र म्याक्स दीपेस खत्रीले निर्माण गर्नेे सो चलचित्रमा प्रदीप भट्टराईले कार्यकारी निर्माताको भूमिका निर्वाह गर्ने छन्। उक्त चलचित्र आगामी फागुन १ गते प्रदर्शन हुने निर्माण पक्षले जनाएको छ।