देशभर प्रदर्शनमा आयो जारी २, कति पायो शो?

काठमाडौँ: शुक्रबारबाट यस वर्षको बहुप्रतिक्षित सिनेमा ‘जारी २: सङ अफ च्याब्रुङ’ प्रदर्शनमा आएको छ। यस सिनेमाको रिलिजको पूर्वसन्ध्यामा हिजो कमलपोखरीस्थित बिग मूभिजमा प्रिमियर शोको आयोजना गरिएको थियो। कवि उपेन्द्र सुब्बाको निर्देशनमा बनेको यस सिनेमाको प्रिमियर शोमा सिनेमाकर्मी र रंगपत्रकारहरूको बाक्लो उपस्थिति रहेको थियो।

प्रिमियर शोमा पुगेका अधिकांशले लिम्बु संस्कृतिमा आधारित सिनेमा उत्कृष्ट बनेको प्रतिक्रिया दिएका थिए। उपस्थित दर्शकहरूले यो सिनेमाले माओवादी जनयुद्धको समयमा धर्म र संस्कृतिमा परेको संकटलाई प्रभावकारी ढङ्गले प्रस्तुत गरेको बताएका थिए।

सिनेमाको प्रिमियर हेर्न निर्माता रोहित अधिकारी, सरोज न्यौपाने, रौनक विक्रम कडेल, अर्जुन कुमार, निर्देशक दीपक प्रसाद आचार्य (काकु), अभिनेता आयुष्मान देशराज जोशी, दिव्यदेव, विपिन कार्की, अभिनेत्री अरुणा कार्की, पुजा चन्द, केकी अधिकारी, तथा ‘जारी २’ टिमका निर्देशक उपेन्द्र सुब्बा, निर्माता रामबाबु गुरुङ र मणिराम पोखरेल, अभिनेता दयाहाङ राई, विजय बराल, अभिनेत्री मिरुना मगर र ऋचा शर्मा पनि उपस्थित थिए। विशेषगरी अभिनेत्री मिरुना मगरको लिम्बु संस्कृति झल्किने ड्रेसअपले सबैको ध्यान खिचेको थियो।

सिनेमाको प्रदर्शन हेर्न विघटित प्रतिनिधि सभाकी उपसभामुख इन्दिरा राना मगर पनि पुगेकी थिइन्। सिनेमा हेरेपछि उनले मिडियासँग प्रतिक्रिया दिँदै भनिन्, ‘मैले ‘जारी’को पहिलो भाग पनि हेरेकी थिएँ। आज दोस्रो भाग पनि हेर्न पाएँ, निकै खुशी लाग्यो। यो सिनेमाले राम्रो सन्देश दिएको छ। पहिलो भागभन्दा फरक कालखण्डमा आधारित यो कथा निर्देशकले अत्यन्त सुन्दर ढङ्गले प्रस्तुत गर्नुभएको छ। मलाई निकै मन पर्यो। दर्शकहरूलाई पनि मन पर्नेमा विश्वास छ। सबैले एकपटक अवश्य हेर्नुहोस्।’

आजबाट विश्वव्यापी रूपमा प्रदर्शनमा आएको यो सिनेमा नेपालभर उच्च शो र दर्शक उत्साहसहित प्रदर्शन भइरहेको छ। विशेषगरी पूर्वी नेपालका हलहरूमा सिनेमाको व्यापार आक्रामक देखिएको छ। उपेन्द्र सुब्बा लिखित तथा निर्देशित यो सिनेमालाई रामबाबु गुरुङ, मधु मिजार र जीवन गुरुङले निर्माण गरेका हुन्। सिनेमामा दयाहाङ राई, मिरुना मगर र विजय बराल प्रमुख भूमिकामा छन्।

बाँसुरी फिल्म्स र कबड्डी फिल्म्सको ब्यानरमा बनेको यो फिल्म यस वर्षको सबैभन्दा व्यापारिक सम्भावना भएको सिनेमाको रूपमा हेरिएको छ। सिनेमामा बुद्धि तामाङ, ऋचा शर्मा, पुष्कर गुरुङ, प्रेम सुब्बा, माओत्से गुरुङ, मानहाङ लावती, विष्णु मोक्तान, कमलमणि नेपाल, अनिल सुब्बा, रेखा लिम्बु, बेदना राई र सिर्जना निङ्लेखुको पनि अभिनय रहेको छ।