राजामौलीविरुद्ध बानरसेनाले दियो प्रहरीमा उजुरी, हिन्दूको भावनामा आघात पुर्‍याएको आरोप

काठमाडौँ: भारतका चर्चित फिल्म निर्माता एसएस राजामौलीविरुद्ध प्रहरीमा उजुरी परेको छ। हैदराबादमा आयोजित एक फिल्म प्रमोसन कार्यक्रममा उनले भगवान् हनुमानबारे दिएको टिप्पणीले हिन्दूहरूको धार्मिक भावनामा आघात पुर्‍याएको आरोपमा उनीविरुद्ध प्रहरीमा उजुरी परेको हो।

बानर सेना संगठनले राजामौलीविरुद्ध उजुरी दर्ता गरेको प्रहरीले जनाएको हो। राजामौलीले नोभेम्बर १५ मा आफ्नो आगामी फिल्म ‘वाराणसी’ का लागि आयोजित ‘ग्लोब ट्रोटर’ कार्यक्रममा सहभागिता जनाएका थिए। सोही अवसरमा आएको प्राविधिक समस्याबीच उनले ‘म सूर्यामि भगवान् हनुमानमा विश्वास गर्दिनँ’ भन्ने अभिव्यक्ति दिएको दाबी उजुरीमा गरिएको छ।

सारूरनगर प्रहरी कार्यालयका एक अधिकारीका अनुसार बानर सेनाले उजुरी दायर गरे पनि अहिलेसम्म मुद्दा दर्ता गरिएको छैन। ‘हामीले उजुरी प्राप्त गरेका छौँ र यस विषयमा आवश्यक अनुसन्धान भइरहेको छ,’ प्रहरी अधिकारीले बताए।

हजारौँ दर्शक उपस्थित रहेको सो कार्यक्रममा पहिलो पटक ‘वाराणसी’ को टिजर, महेश बाबुको पहिलो झलक तथा फिल्मको शीर्षक सार्वजनिक गरिएको थियो। कार्यक्रममा महेश बाबु, पृथ्वीराज सुकोमरन र प्रियंका चोपडासहित फिल्मका मुख्य कलाकारहरूको उपस्थिति थियो।

फिल्ममा प्रियंका चोपडा ‘मन्दाकिनी’ को भूमिकामा र पृथ्वीराज ‘कुम्भ’ को भूमिकामा देखिनेछन्। ‘वाराणसी’ फिल्म सन् २०२७ को मकर सङ्क्रान्तिमा प्रदर्शनमा आउने तय गरिएको छ।