काठमाडौँ: दिग्गज गायकद्वय शिशिर योगी र आनन्द कार्कीको शक्तिशाली स्वरमा नयाँ पुस्ताका प्रतिभा बेनिशा पौडेल र रचना रिमालको सहकार्यमा ‘खरानीको धूलोबाट उठाउनु छ देश’ सार्वजनिक भएको छ।
देशप्रेम, पुनर्जागरण र आशाको सन्देश बोकेको गीतमा योगी र कार्कीको प्रबुद्ध स्वरसँगै पौडेल र रिमालको युवा जोश मिसिएको छ। योगी अम्बर गुरुङका शिष्य तथा रेडियो नेपालबाट स्वर परीक्षा पास गरेर दर्जनौँ हिट गीत दिएका गायक हुन्। यस्तै नेपाली सांगीतिक धरातलमा चार दशक बिताएका कार्कीले ‘जनम जनम जिउँला सँगै’, ‘यी हल्लाहरू हुन्’, ‘लाग्छ मन हेरिरहूँ’ जस्ता कालजयी गीत दिएका छन्।
पौडेल र बेनिशा गायन रियालिटी शो नेपाल आइडलबाट चर्चामा आएका हुन्।
श्याम पौडेल अफिसियल युट्युब च्यानलबाट सार्वजनिक गीतको शब्द श्याम पौडेल, संगीत ज्योति प्रकाश र एरेन्ज मनोहर सुनामले गरेका हुन्। मिक्सिङ–मास्टरिङ प्रकाश खरेलको छ भने गीत म्युजिक नेपाल स्टुडियोमा रेकर्ड गरिएको हो। गीतको भ्वाइस ओभर पुष्प शर्माले दिएका छन्।
सार्वजनिक गरिएको भिडियोमा शिवन पोखरेलसहित सन्चिता शाही, धर्मराज पोखरेल, रश्मि भट्ट, रबिना कार्की, स्वस्तिका गिरीलगायत कलाकारहरूको सहभागिता छ। अभिनाश श्रेष्ठले छायांकन गरेको भिडियोमा सुदीप मैनाली क्यामेरा सहायक छन्। मेकअप सन्तोषी कार्की र मेनुकाले सम्हालेका छन्।
भिडियोलाई ओम प्रसाईले एडिट तथा कलर गरेका छन् भने पोस्ट–प्रोडक्सन अविनवन मिडियाले गरेको हो। निर्देशन दिपेन्द्र प्रकाश केसीले र निर्देशन सल्लाह शिवन पोखरेलले प्रदान गरेका छन् भने जयाराम थापा प्रोडक्सन म्यानेजरका रूपमा रहेका छन्।
राष्ट्रिय भावना र नयाँ पुस्ताको स्वरले सजिएको यस गीतले दर्शक–श्रोतालाई प्रेरित गर्ने अपेक्षा गरिएको छ।
